हिमाली र पहाडी विमानस्थलबाट आन्तरिक उडान खोल्ने यस्तो छ तयारी

९ भदौ, काठमाडौं । नजिकिएको चाडबाडलाई मध्यनजर गर्दै सरकारले आन्तरिक उडान सुरु गर्ने तयारी थालेको छ । यद्यपी पहिलो चरणमा आन्तरिक उडान भने काठमाडौंबाट हिमाली र पहाडी भेगका विमानस्थलमा मात्र हुने भएको छ ।

सो प्रयोजनका लागि निजी क्षेत्रका वायुसेवा कम्पनीसँग छलफल थालिएको संस्कृति, पर्यटन तथा नागरिक उड्डयनमन्त्री योगेश भट्टराईले जानकारी दिए ।

चाडबाड आएका छन्, उडान त खोल्नु परिहाल्छ, मंगलबार मन्त्रालयमा आयोजित वार्षिक प्रगति सार्वजनिक कार्यक्रममा उनले भने, तर तराईमा तत्काल खुल्दैन ।

तराईका जिल्लामा बढ्दो कोरोना भाइरसको संक्रमणका कारण ती क्षेत्रमा रहेका विमानस्थलको उडान भने अहिले खुल्ने छैन । उडान खुल्ने या नखुल्ने सन्दर्भमा समेत मन्त्रालय आफैंले पनि निर्णय गर्न सक्दैन ।

सोहीकारण पहाड र हिमाली भेगका विमानस्थलमा उडान खोल्ने गरी आफूले मन्त्रिपरिषदमा प्रस्ताव लैजाने जानकारी उनले दिएका छन् । अन्तर्राष्ट्रिय उडान भने १६ भदौबाट खुल्नेछ ।

यस अगाडि मन्त्रालयले केही गन्तब्यमा चार्टर्ड उडानको तालिका सार्वजनिक गर्दैछ । नियमित उडानका लागि यसअघि नेपाल नागरिक उडड्यन प्राधिकरणमा उडानका लागि निवेदन दिएका १३ वटा कम्पनीलाई नै पहिलो चरणमा अनुमति मिल्नेछ ।

सरकारले पीसीआर परीक्षण सहज हुने मुलुकमा मात्र पहिलो चरणमा उडानको अनुमति दिनेछ । अन्य मुलुकमा भने चार्टर्ड जहाज पठाएर नेपालीको उद्धार हुनेछ । १५ भदौपछि अधिकतम् प्रतिदिन ५ सय जनाले नेपाल आउने अनुमति पाउनेछन् ।

परिस्थिति सामान्य बन्दै गएपछि यो संख्या क्रमशः बढाइने मन्त्री भट्टराई जानकारी दिए । ठूलो माग र दवाव आएको छ, संख्या बढाउन, तर परिस्थिति हेरेर मात्र यसमा अर्को निर्णय हुन्छ, उनले भने । नेपालमा १० चैतबाट सबै प्रकारका व्यवसायिक उडान बन्द छन् । अनलाइनखबरबाट साभार

आन्तरिक उडान कहिलेदेखि ?

८ भदौ, काठमाडौं । सरकारले १६ भदौदेखि शर्तसहित खुला गर्ने निर्णयसँगै अन्तर्राष्ट्रिय व्यवसायिक उडान सञ्चालनको तयारी सुरु भएको छ । तर, आन्तरिक उडानका सम्बन्धमा भने सरकारले अहिलेसम्म कुनै निर्णय गरिसकेको छैन ।

हुनत सरकारको अहिलेसम्मको निर्णय भदौ १५ गतेसम्म मात्र आन्तरिक उडान बन्द गर्ने हो । तर आन्तरिक उडान खुल्ने वा नखुल्ने भन्ने कुरा काठमाडौं र तराईका ठूला विमानस्थल रहेको शहरमा हुने संक्रमणको अवस्थामा निर्भर हुने नेपाल नागरिक उड्डयन प्राधिकरणको भनाइ छ ।

‘उडान कहिलेबाट कुन कुन गन्तब्यमा खुल्ने निर्णय सरकारबाटै आउनुपर्छ’, प्राधिरणकाका उपमहानिर्देक राजकुमार क्षेत्री भन्छन्, ‘हवाइजहाज खुल्ने नखुल्ने भन्ने विषय संक्रमणसँगै तय हुन्छ ।’

यद्यपी आन्तरिक उडानका विषयमा के गर्ने भन्नेबारे छलफल भने चलिरहेको उनले जानकारी दिए । यता, व्यवसायीले भने सुरक्षा प्रवन्ध अपनाएर उडान खोल्नुपर्ने माग गरिरहेका छन् । पर्यटक र हवाई यात्रुको बढ्दो चापसँगै व्यवसायमा अर्बौ रुपैयाँ लगानी गरेका व्यवसायी ६ महिनाभन्दा लामो समयदेखिको बन्दले धरासायी हुने अवस्थामा पुगेको वायुसेवा संचालक संघको भनाइ छ ।

सरकारले १ भदौबाट गरेको तयारीमा समेत तत्काल काठमाडौंबाट तराईका ठूला विमानस्थलमा उडान नखोलिने निर्णय भएको थियो । संस्कृति, पर्यटन तथा नागरिक उड्डयन मन्त्रालयले कोरोना महामारी संकट व्यवस्थापन केन्द्र (सीसीएमसी) मा सोहीअनुसार प्रस्ताव लगेको थियो ।

तर, १५ दिन प्रतिबन्ध थप गरिएको थियो । मन्त्रालयको तयारी अनुसार पहिलो चरणमा आन्तरिक उडानतर्फ पोखरा र भरतपुरमा उडान खोल्ने प्रस्ताव गरिएको थियो । तर, अब भने भरतपुरसमेत जोखिमयुक्त शहरमा परिसकेको छ । ‘भरतपुर र तराईका विमानस्थल कोरोनाको सबैभन्दा जोखिममा छन्’, उपमहानिर्देशक क्षेत्री भन्छन्, ‘काठमाडौंको समेत जोखिम समेतलाई आधार मानेर मात्र आन्तरिक उडानका सम्बन्धमा निर्णय हुन्छ ।’

निराश व्यवसायी

सरकारले कोरोना भाइरसको महामारी नियन्त्रणका लागि बन्द गरेको व्यवसायिक उडान अनिश्चित बनेपछि व्यवसायी भने निराश छन् ।

‘कि बन्दाबन्दीपछि सार्वजनिक स्वास्थ्य र कोरोना नियन्त्रणमा सकारात्मक परिणाम देखिनु पर्यो’, एक हवाई व्यवसायीले भने, ‘न महामारी नियन्त्रण हुने, न व्यवसाय, त्यसका कारण अर्बौं लगानी धरासायी भएपछि त्यसको पूर्तिमा कसले सहयोग गर्छ ?’

नेपालमा १० चैतयता हवाई सेवा बन्द छ । यसरी लामो समय हवाई सेवा लामो समयसम्म बन्द हुँदा त्यसले प्रत्यक्ष–परोक्ष आश्रित हजारौं श्रमिकको आयस्रोत र उनीहरुमा आश्रित परिवारको रोटीरोटी बन्द भएको संघका अध्यक्ष रामेश्वर थापाको भनाइ छ ।

व्यवसायीले हवाई उद्योगलाई धरासायी हुनबाट समेत बचाउन सरकारसँग गरेका छन् । उता, हवाई उडानको प्रतिक्षामा बसेका हजारौं यात्रु समेत अन्यौलमा छन् । अच्युत पुरी/अनलाइनखबरबाट

Leave a Reply

Your email address will not be published. Required fields are marked *