चिनियाँ खोपलाई थप चार मुलुकमा अनुमति

२१ भदौ, काठमाडौं । चिनियाँ कम्पनी चाइना नेशनल बायोटेक ग्रुप (सीएनबीजी) र सिनोभ्याक बायोटेक लिमिटेडले शनिबार थप चार मुलुकले आफ्नो निर्माणको क्रममा रहेको कोरोना भाइरस (कोभिड-१९)विरुद्धको खोपको क्लिनिकल परीक्षणको लागि अनुमति दिएको बताएको छ ।

चीन अहिले आफ्नो कोरोना खोप सफल बनाउने प्रयासमा लागेको छ । अहिले अनुमति दिने मुलुकमध्ये सर्बिया र पाकिस्तान पनि हुन् ।

चीनमा कोरोना भाइरसका संक्रमित निकै कम छन् । त्यसले चीन अन्य मुलुकमा आफ्नो खोपको परीक्षण गराइरहेको छ । सर्बियामा सीएनबीजीले निर्माण गरिरहेको दुई खोपको परीक्षण हुनेछ । यी दुई खोप वुहान र बेइजिङको सीएनबीजी एकाइमा तयार पारिएको थियो । साथै पाकिस्तानमा बेइजिङको एकाइमा निर्माण गरिएको खोपको परीक्षण हुनेछ ।

सीएनबीजीले निर्माण गरेको खोपको तेस्रो चरणको क्लिनिकल परीक्षणमा १० मुलुकका करिब ५० हजार मानिस सामेल हुने सम्भावना छ । यसअघि यूएई, बहराइन, पेरु, मोरक्को, अर्जेन्टिना र जोर्डनमा यो खोपको परीक्षण सुरु भइसकेको छ ।

‘फ्रान्समा अबको १५ दिनमा गम्भीर बन्न सक्छ कोरोना संक्रमणको अवस्था’

फ्रान्सका स्वास्थ्यमन्त्री ओलिभियर वेरनले फ्रान्सलाई आगामी दुई साता थप सतर्कता अपनाउनु जरुरी रहेको बतएका छन् ।

उनले कोरोना भाइरस (कोभिड-१९) को महामारीको कारण उक्त अवधिमा फ्रान्समा आईसीयूमा भर्ना हुनेको संख्या पनि बढ्न सक्ने बताएका छन् । पछिल्लो केही दिनमा फ्रान्समा कोरोना भाइरसको संक्रमण बढिरहेको छ ।

वेरनले एक टेलिभिजन च्यानललाई दिएको अन्तर्वार्तामा राष्ट्रव्यापी लकडाउन भने आवश्यक नरहेको बताएका छन् । उनले फ्रान्ससँग कोरोना भाइरसको महामारीसँग लड्ने अन्य तरिका पनि रहेको बताएका हुन् । उनले भने, ‘म लकडाउनको कल्पना गर्न सक्दिनँ ।’

फ्रान्समा कोरोना भाइरसको कारण संक्रमित हुनेको संख्या तीन लाख ४७ हजार २६७ पुगेको छ । साथै कोरोना भाइरसबाट मृत्यु हुनेको संख्या पनि ३० हजार ७३० पुगेको छ ।

भारतमा एकैदिन ९० हजार ६३३ जनामा कोरोना संक्रमण पुष्टि

भारतमा पछिल्लो २४ घण्टामा कोरोना भाइरस (कोभिड-१९) का ९० हजारभन्दा धेरै संक्रमित थपिएका छन् ।

भारतको स्वास्थ्य मन्त्रालयले दिएको जानकारीअनुसार पछिल्लो २४ घण्टामा भारतमा ९० हजार ६३३ नयाँ संक्रमित थपिएका हुन् । यससँगै भारतमा कोरोना भाइरसबाट संक्रमित हुनेको समग्र संख्या ४१ लाख १३ हजार ८१२ पुगेको छ ।

त्यस्तै भारतमा कोरोना भाइरसको कारण मृत्यु हुनेको संख्या पनि ७० हजार नाघेको छ । अहिलेसम्म भारतमा कारोना भाइरसको कारण ७० हजार ६२६ जनाको मृत्यु भइसकेको छ । पछिल्लो २४ घण्टामा मात्र भारतमा कोरोना भाइरसको कारण एक हजार ६५ जनाको मृत्यु भएको हो ।

भारतमा निरन्तर कोरोना भाइरसका संक्रमित संख्या बढ्दो क्रममा रहेको छ । अहिले भारत विश्वमा सबैभन्दा धेरै नयाँ संक्रमित र मृतक भेटिने मुलुक बन्न पुगेको छ । पछिल्लो केही दिनयता भारतले निरन्तर कोरोना भाइरसका नयाँ संक्रमित संख्यामा नयाँ रेकर्ड बनाउँदै आएको छ । यद्यपि भारतमा कोरोना भाइरसबाट मृत्यु हुनेको संख्या भने तुलनात्मकरुपमा कम छ । भारतले पनि यसैलाई आफ्नो सफलता बताउँदै आएको छ ।

जोन्स हप्किन्स युनिभर्सिटीको तथ्यांकअनुसार अहिले विश्वभरमा भारत संक्रमित संख्याको आधारमा तेस्रो स्थानमा छ । पहिलो स्थानमा अमेरिका र दोस्रोमा ब्राजिल छ । तर, भारत ब्राजिलभन्दा धेरै पछि छैन ।

अहिले भारतमा कोरोना भाइरसको कारण सबैभन्दा बढी प्रभावित बनेको महाराष्ट्रमा अहिलेसम्म आठ लाख ६० हजारभन्दा धेरै संक्रमित फेला परिसकेका छन् । यो राज्यमा अहिलेसम्म कोरोना भाइरसको कारण २६ हजार २७६ जनाको मृत्यु भइसकेको छ ।

त्यस्तै संक्रमित संख्याको आधारमा दोस्रो सबैभन्दा बढी प्रभावित आन्ध्र प्रदेशमा अहिलेसम्म चार लाख ८७ हजारभन्दा धेरै कोरोना भाइरसका संक्रमित फेला परिसकेका छन् भने चार हजार ३४७ जनाको मृत्यु भइसकेको छ । त्यस्तै तामिलनाडुमा पनि चार लाख ५५ हजारभन्दा धेरै संक्रमित फेला पर्दा सात हजार ७४८ जनाको मृत्यु भइसकेको छ ।

अहिलेसम्म भारतमा कोरोना भाइरसका ३१ लाख ८० हजारभन्दा धेरै संक्रमित निको भएर फर्किसकेका छन् भने आठ लाख ६२ हजारभन्दा धेरै संक्रमित निको हुन बाँकी छन् ।

 

Leave a Reply

Your email address will not be published. Required fields are marked *