उपत्यकाका थपिए आधाभन्दा धेरै कोरोना संक्रमित, देशभर कुन जिलामा कति थपिए ? [विवरणसहित]

असोज ११, काठमाडौं । आइतबार थपिएका कोरोना संक्रमितमध्ये काठमाडौं उपत्यकाका मात्रै आधाभन्दा धेरै छन्।

काठमाडौं उपत्यकामा थप ८ सय ९ जनामा कोरोना भाइरसको संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ। यस दिन देशभर १ हजार ५७३ जनामा कोरोना पुष्टि भएको छ।

उपत्यकामा थपिएकामध्ये काठमाडौं जिल्लाका ६ सय ३३ जना, भक्तपुरका ७२ जना र ललितपुरका १०४ जना छन्। उनीहरूको विभिन्न प्रयोगशालामा परीक्षण गरिएको थियो।

हालसम्म देशभर ७३ हजार ३ सय ९४ जनामा कोरोना संक्रमण पुष्टि भएको छ। तीमध्ये ५३ हजार ८ सय ९८ जना निको भइसकेका छन्। पछिल्लो २४ घण्टामा मात्रै ८ सय ८५ जना निको भइ घर फर्किएका छन्।

संक्रमणबाट नेपालमा अहिलेसम्म ४ सय ७७ जनाले ज्यान गुमाएका छन्। पछिल्लो २४ घण्टामा यसको संक्रमणबाट १० जनाको मृत्यु भएको मन्त्रालयले जनाएको छ।

यस्तै स्वास्थ्य तथा जनसंख्या मन्त्रालयले कोरोना परीक्षणका लागि स्वाब दिनेको पोजेटिभ वा नेगेटिभ जे रिपोर्ट आएपनि सम्बन्धितलाई सिधै जानकारी गराउन सरकारी तथा निजी ल्याबहरुलाई निर्देशन दिएको छ ।

मन्त्रालयका प्रवक्ता डा जागेश्वर गौतमले यसअघि नेगेटिभ रिपोर्ट आए सम्बन्धित र पोजेटिभ आए इपिडिमियोलोजी तथा रोग नियन्त्रण महाशाखामा जानकारी गराउने व्यवस्था रहेकोमा अब भने जे रिपोर्ट आएपनि सिधै सम्बन्धितलाई नै जानकारी गराउन निर्देशन दिइएको बताए ।

पहिले जतिपनि संक्रमित थिए उनीहरुलाई स्वास्थ्य संस्थाको आइसोलेशनमा मात्रै राख्ने व्यवस्था रहेकोमा अहिले होम आइसोलेशनमा पनि राख्ने व्यवस्था रहेकाले यसअघिको निर्णय परिवर्तन गरिएको उनको भनाइ छ । संक्रमितलाई रोग नियन्त्रण महाशाखाले जानकारी गराउने भन्दा पनि ल्याबले सिधै जानकारी गराउँदा व्यवस्थापनमा छिटो हुने मन्त्रालयको भनाइ छ।

यस्तै कतिपय मेडिकल कलेजहरुले विद्यार्थीहरुलाई पीसीआर गरेर मात्रै परीक्षामा सहभागी गराउने निर्णय गरेको पाइएको भन्दै मन्त्रालयले त्यसो नगर्न सचेत गराएको छ ।

 

Leave a Reply

Your email address will not be published. Required fields are marked *