कुखुराको मासुको स्वादिलो परिकार खान मन छ ? यसरी बनाउनुहोस् चिकेन क्रिस्पी

सामान्यतया हामीलाई मासुका सीमित परिकार मात्रै बनाउन आउँछ। केही नयाँ परिकार बनाउने धूनमा हामीले आफ्नै सुरमा रेसिपी बनायौं भने परिकार नै बिग्रिन सक्छ।

त्यसैले आज हामी कुखुराको मासु मन पराउनेहरूका लागि चिकेन क्रिस्पी बनाउने तरिका सिकाउँदैछौं

यसका लागि निम्न सामग्री चाहिन्छः

४ चम्चा तेल
४ चम्चा पिठो

२० मिली दूध

१ सय १५ ग्राम पाकेको चिकेन
५५ ग्राम ह्वाइट ब्रेड (सेतो पाउरोटी)
हरियो धनियाँ (काटेको)

नुन (स्वाद र आवश्यकता अनुसार)
मरिचको धूलो (आवश्यकता अनुसार)
एउटा अन्डा

बनाउने तरिकाः

प्यानमा तेल राखेर मन्द आगोमा तताउने। तातेपछि यसमा केही मात्रामा पिठो राख्ने र राम्रोसँग चलाउने।

एक मिनेटसम्म पकाउने र प्यान निकालेर दूध मिसाएर राम्रोसँग चलाउने। उक्त मिश्रणलाई राम्रोसँग चलाउँदै मन्द आगोमा फेरि पकाउने। अनि निकालेर त्यसमा चिकेन राखेर राम्रोसँग मोल्नुपर्छ।

यसपछि नुन, धनियाँ र मरिचको धूलो राख्ने। अब यसलाई चिसो हुँदासम्म यसै छाडिदिने। चिकेन क्रिस्पी सेलाउन्जेल एउटा भाँडामा अन्डा फुटाएर राख्नुहोस्। फुटाएको अन्डा राम्रोसँग फिट्नुहोस्।

अब ह्वाइट ब्रेड अन्डामा राख्नुहोस् र सबैतिर अन्डा लाग्नेगरी चोब्नुहोस्। अनि प्यानमा तेल राखेर यसलाई पकाउनुहोस्। यसलाई ५ देखि १० मिनेटसम्म पकाउनुपर्छ।

यसरी तयार भएको ब्रेडलाई चिकेन क्रिस्पीसँग मिसाएर खाँदा स्वादिष्ट हुन्छ।

(यो परिकार बनाउने तरिका हामीले कस्मोपोलिटियन सेफ कुमार चालिसेको सहयोगमा तयार पारेका हौं।)

दशैँमा कस्तो मासु खाने कस्तो नखाने ? यसरि छान्नुहोस् स्वस्थ्य मासु

घरमा खसी काट्दा धेरै परिमाणमा मासु स्टोर गरेर राख्न नजान्दा मासु बिग्रन सक्छ र त्यो मासुले हाम्रो शरीरमा फाइदाको सट्टा बेफाइदा पुर्‍याउँछ। त्यस्तै राम्रै मासु पनि राम्रोसँग प्रयोग गर्न नजान्दा त्यसबाट पाउन सक्ने पौष्टिक तत्व प्राप्त गर्न सकिँदैन।

मासुबाट १४ देखि २० प्रतिशतसम्म प्रोटिन पाइन्छ। त्यस्तै यसमा भिटामिन बी, जिंक, पोटासियमजस्ता तत्वहरू पनि पाउन सकिन्छ।

यस्तो गुणकारी चिजमा हामीले सानो लापरबाहीले गर्‍यौं भने उत्तिकै हानिकारक हुन्छ भन्नेमा दुईमत छैन।

त्यस्तै मासु काट्ने ठाउँ सफासुग्धर नभए यसले विभिन्न सरुवा रोग समेत निम्त्याउने चिकित्सकहरू बताउँछन्। सानोतिनो कुरामा ध्यान नदिनाले चाडवाडको लगत्तै अस्पतालमा बिरामीको चाप बढ्ने गरेको जानकारहरू बताउँछन्। यो समयमा धेरैजसो ‘फुड प्वाइजन’का बिमारी आउने चिकित्सकहरूको अनुभव छ।

सही तरीकाले मासु पकाउन, खान, स्टोर गर्न र सरसफाईमा ध्यान दिन नजान्दा मासुले हाम्रो शरीरमा नराम्रो असर पार्न सक्छ।

कस्तो मासु खाँदा रोग लाग्छ ?

– सडेगलेको मासु
– नपाकेको, काँचो तथा पोलेको कालो मासु
– मासु राखेको फ्रिज चलेन भने वा धेरै बेर फ्रिज बाहिर राखेको मासु खाएमा
– जनावर काट्ने बित्तिकै तत्काल पकाएर खाएमा

– बिरामी पशुपन्छीको मासु
– मासु पकाउने व्यक्ति नै स्वस्थ छैन भने
– मासु काट्ने हतियार, अचानो, स्थान सफा नभएमा

यसरी छान्नुस् स्वस्थ्य मासुः

– मासु हलुका गुलाबी, हरियो तथा प्याजी रङको भए त्यस्तो मासु खानु हुँदैन।
–अमिलो र बिग्रिएको जस्तो गन्ध आएको मासु खानु हुँदैन।

– मासु फ्रिजमा छोपेर राख्नुपर्छ र फ्रिज चालु अवस्थामा छ कि छैन याद गर्नुपर्छ।
– मासु समाउँदा वा काट्दा तन्केको जस्तो हुनु हुँदैन।
– तराजु, मासु काट्ने मानिस, लगाएको कपडा, हतियार, मासु काट्ने स्थान आदि सफा छ कि छैन, याद गर्ने।

कस्तो मासु नखाने?

–फ्रिजमा धेरै समय राखेको मासु नखाने
–खुला ठाँउमा राखेको नखाने

–काँचो मासु नखाने
–मासु पोल्दा राम्रोसँग नपाक्ने र धुँवाबाट विषाक्तता बढ्ने सम्भावना हुनाले यस्तो मासु सकेसम्म नखाने
–धेरै मसला तथा चिल्लो भएको मासु नखाने
– बोसो तथा छालाको सकेसम्म प्रयोग नगर्ने

दसैंमा समयमा विशेष ध्यान दिनुपर्ने कुराः
– खसी किन्नुभन्दा पहिले स्वस्थ्य छ कि छैन भनेर जाँच्ने।
–मासु नै किनेर ल्याउने भए विश्वासिलो पसलबाट मात्र ल्याउने।

– मासु काट्ने र पकाउने ठाउँको सरसफाइमा विशेष ध्यान दिने।
– मासु खानेबित्तिकै दही, आइसक्रिम लगायत क्रिमका परिकार नखाने
–मासु खाँदा अधिकतम सागसब्जी, सलाद आदि पनि खाने

– धेरै मासु नखाने
– नियमित व्यायाम तथा कसरत गर्ने
– आफू स्वस्थ नभएको जस्तो महसुुस भएमा माछा–मासु नखाने

यो लेख दुई दशकदेखि क्रियाशील वरिष्ठ सेफ कुमार चालिसेको सहयोगमा तयार पारिएको हो। उनी अष्ट्रेलियाको ‘टेफ एनएसडब्लु’ नामक संस्थाद्वारा ‘ट्रेनिङ एण्ड एसेसमेन्ट’ का लागि ‘सर्टिफाइड’ सेफ हुन्। हाल उनी बाजेको सेकुवामा कर्पोरेट सेफ तथा काठमाडौंको गेट कलेजमा सेफ तथा निरीक्षकका रुपमा कार्यरत छन्। त्यस्तै उनले पाकशास्त्रमा आधारित किताब लेखिसकेका छन्।

 

Leave a Reply

Your email address will not be published. Required fields are marked *