हेटौंडा, मंसिर १७ गते । अनियमितता, व्यथिति र व्यापक भ्रष्टाचारविरुद्ध देशभर फैलिँदै गएको जेन जि आन्दोलनले मकवानपुरमा औपचारिक रूपमै चार बुँदे मूल एजेण्डा सार्वजनिक गर्दै युवा पुस्तालाई एकताबद्ध हुन आह्वान गरेको छ। जेन जि आन्दोलनका प्रतिनिधि समूहहरूले जारी गरेको प्रेस विज्ञप्तिमा वर्तमान राज्य संरचनाबाट निराश युवा पुस्ता अब मौन बस्न नसक्ने उल्लेख गर्दै आन्दोलनलाई “ऐतिहासिक क्रान्ति” को रूप दिएको छ।
वक्तव्यअनुसार जेन जि आन्दोलनका चार मुख्य एजेण्डा यस प्रकार छन्—
१) प्रत्यक्ष निर्वाचित कार्यकारी प्रधानमन्त्रीको व्यवस्था
२) भ्रष्टाचार नियन्त्रणका लागि स्वायत्त, शक्तिशाली र दण्डात्मक अधिकार प्राप्त आयोगको निर्माण
३) विदेशमा रहेका नेपाली नागरिकलाई मत अधिकारको पूर्ण सुनिश्चितता
४) आवश्यकताअनुसार प्रदेश संरचनाको परिमार्जन
विज्ञप्तिमा यी एजेण्डाहरू केवल कागजमा सीमित नहुने बताउँदै व्यवहारमै लागू गर्न युवाबीच एकता र सामूहिक उभार अपरिहार्य भएको उल्लेख गरिएको छ।
मकवानपुर जेन जि कमिटीका संयोजक सुबिन खत्रीले जारी गरेको विज्ञप्तिमा, “आजको एकता भोलिको परिवर्तन, आजको कदम भोलिको सशक्त राष्ट्र” भन्ने नारासहित सबै युवालाई सक्रिय रूपमा अभियानमा सहभागी भएर जनदबाब र क्रान्तिलाई सशक्त बनाउन आग्रह गरिएको छ।
मकवानपुर जेन जि कमिटीका संयोजक खत्रीले आज जारी गरिएको उक्त विज्ञप्तिमा मकवानपुरलाई आगामी ‘महान अभियान’ को अग्रपंक्तिमा नया युवा पुस्तालाई उभ्याउने संकल्प समेत गरिएको छ।
