थाहा नगरपालिका,बैशाख १७ गते । थाहा नगरपालिका, मकवानपुरले ऐतिहासिक बज्रबाराही अजिमा जात्राको अवसरमा आगामी वैशाख २१ गते (सोमबार) नगर क्षेत्रभर सार्वजनिक विदा दिने निर्णय गरेको छ।
नगर कार्यपालिकाको वैशाख १६ गते बसेको बैठकले हरेक तीन वर्षमा मनाइने यस महत्वपूर्ण सांस्कृतिक तथा धार्मिक जात्रालाई सम्मान गर्दै उक्त दिन सार्वजनिक विदा दिने निर्णय गरेको हो।
नगरपालिकाका प्रमुख प्रशासकीय अधिकृत निरज पौडेलद्वारा जारी सूचनामा नगरभित्रका सम्पूर्ण सरकारी कार्यालय, शैक्षिक संस्था तथा सार्वजनिक निकायहरूमा विदा लागू हुने जनाइएको छ।
बज्रबाराही अजिमा जात्रा थाहा नगरपालिकाको प्रमुख धार्मिक तथा सांस्कृतिक पर्वका रूपमा मनाइन्छ। यस अवसरमा स्थानीयवासीहरू परम्परागत रूपमा पूजा, जात्रा र विभिन्न सांस्कृतिक कार्यक्रमहरू आयोजना गर्दै उत्सव मनाउने गर्दछन्।
नगरपालिकाले सम्पूर्ण नगरवासीलाई उक्त पर्वमा सहभागी भई यसको गरिमा बढाउन अनुरोध समेत गरेको छ।
