हेटौंडा,जेठ १३ गते। हेटौंडा उपमहानगरपालिका–१५ र १७ नम्बर वडामा सञ्चालन गरिएको गृहिणी महिला सशक्तीकरण कार्यक्रम अन्तर्गत उद्यमशीलता प्रवर्द्धन, पशुपालन तथा कृषि व्यवसाय सम्बन्धी तालिम सम्पन्न भएको छ ।
कार्यक्रममा हेटौंडा उपमहानगरपालिकाका नगर प्रमुख मीनाकुमारी लामा साथै उपमहानगरपालिकाका निमित्त प्रमुख प्रशासकीय अधिकृत विष्णु कुमारी लामिछाने सहभागी भएका थिए ।
दिगो आयआर्जनलाई लक्षित गर्दै सञ्चालन गरिएको तालिमले महिलाहरूलाई कृषि तथा पशुपालन व्यवसायतर्फ प्रेरित गर्ने उद्देश्य राखिएको आयोजकले जनाएको छ । तालिममा सहभागी महिलाहरूले विशेषगरी बाख्रापालन सम्बन्धी व्यावहारिक तथा व्यवसायिक जानकारी लिएका थिए ।
कार्यक्रममार्फत महिलाहरूलाई आत्मनिर्भर बनाउने, सीप विकास गर्ने तथा स्वरोजगारका अवसर सिर्जना गर्ने लक्ष्य राखिएको थियो ।
सामाजिक विकास कार्यालय र हेटौंडा उपमहानगरपालिका को साझेदारीमा सञ्चालन गरिएको उक्त तालिमप्रति सहभागी महिलाहरूले उत्साहजनक सहभागिता जनाएका थिए ।
