मनहरी । मनहरी-२, टाँडी निवासी सुरेन्द्र राईको भान्सामा राखिएको खाना पकाउने ग्यासको सिलिन्डर पड्किँदा १ हल गोरु र ७ वटा बाख्रा सहित गोठ जलेर नष्ट भएको छ । घरमा कोहि नभएको बेला अचानक आगलागी भइ सिलिन्डर पड्किएको हुँदा मानवीय क्षती भएको छैन ।
बुधबार दिउँसो राईको घरमा कोहि नभएको बेला एक्कासि सिलिन्डर पड्किएर आगलागि भएको हो । बिजुली सट भएर सिलिन्डरमा आगो लागेको हुन सक्ने सुरेन्द्र राईले बताएका छन् । आगलागीबाट गोठमा रहेको भान्साका भाँडाकुँडा सहित सम्पूर्ण सामान जलेको छ । त्यस्तै गोठमा रहेका १ हल गोरु र ७ वटा बाख्रा जलेर नष्ट भएको छ । साथै गोठका काठपात, जस्ता लगायत सबै संरचना जलेर नष्ट हुँदा लगभग ८ लाख बराबरको सम्पत्ति नष्ट भएको राईले बताएका छन् ।
श्रीमान्, श्रीमती र दुई छोराछोरी सहित चार जना परिवार भएको सुरेन्द्र राईको घरमा हाल श्रीमान् र श्रीमती मात्रै बस्दै आएका छन् । छोराछोरी कामको सिलसिलामा भारत गएका सुरेन्द्रले बताएका छन् । अचानक नसोचेको घटना घट्दा आकाशबाट खसेजस्तै भएको उनको भनाइ छ । भएका सबै सम्पत्ति जलेर नष्ट भएपछी सुरेन्द्र राईको परिवार बिचल्ली भएको छ ।
