हेटौंडा,साउन ३१। तामाङ पत्रकार संघ, बागमती प्रदेश समिति तथा तामाङ पत्रकार संघ, मकवानपुरको आयोजनामा ३२औं तामाङ प्रसारण दिवस–२०८२ को अवसरमा भोलि हेटौंडामा ‘अन्तरक्रिया कार्यक्रम तथा पुरस्कार वितरण समारोह–२०८२’ हुने भएको छ।
उक्त कार्यक्रम भदौ १ गते (भोलि), हेटौंडाको पल्पसा सदनमा दिउँसो ३:३० बजे आयोजना गरिने छ। कार्यक्रममा “बागमती प्रदेशको सरकारी कामकाजी भाषाको रूपमा तामाङ भाषाको प्रयोगलाई प्रभावकारी बनाउने सञ्चारमाध्यम तथा सरकारी निकायको भूमिका के हो?” भन्ने विषयमा विशेष प्यानल छलफल हुने जनाइएको छ।
प्यानल छलफलमा सहभागी हुने विशिष्ट व्यक्तिहरुमा कैलारा गाउँपालिकाका अध्यक्ष लोक बहादुर मोक्तान, नेपाल तामाङ घेदुङका केन्द्रीय सदस्य मेम्बर लो तामाङ, बागमती प्रदेशका संस्कृत तथा पर्यटन मन्त्रालयका सचिव दीपेन्द्र सुवेदी, बरिष्ठ पत्रकार प्रताप बिष्ट, तथा नेपाल पत्रकार महासंघ बागमती प्रदेश मकवानपुरका अध्यक्ष कृष्ण सारु मगर रहनेछन्।
संस्कृति तथा पर्यटन मन्त्रालय, बागमती प्रदेश, हेटौंडाको सहयोगमा आयोजना हुन लागेको उक्त कार्यक्रममा तामाङ भाषाको विकास, सरकारी प्रयोग, सञ्चार क्षेत्रको भूमिका लगायतका विषयमा छलफल गरिनेछ भने विभिन्न विधामा योगदान पुर्याएका व्यक्तित्वहरुलाई पुरस्कार वितरण समेत गरिनेछ।
