हेटौंडा,भदौ २ । हेटौंडा उपमहानगरपालिका–१३ स्थित पदमपोखरीमा भूमिहीन सङ्घर्ष समितिले चलाइरहेको “मध्यवर्ती क्षेत्र खारेज गरौं” भन्ने मूल नाराका साथ हस्ताक्षर संकलन अभियान आज सातौं दिनमा पुगेको छ। आज मात्र ७०० जना स्थानीय नागरिकहरूले अभियानमा सहभागिता जनाउँदै हस्ताक्षर गरेका छन्।
आजको कार्यक्रममा नमो बुद्ध टोल विकास संस्था र मेन्दोलोङ टोल विकास संस्थाका स्थानीयहरूको सक्रिय सहभागिता रहेको थियो। कार्यक्रममा महिला, वृद्धवृद्धा तथा युवाहरूको उल्लेखनीय उपस्थिति रहेको थियो।
सङ्घर्ष समितिले हेटौंडा उपमहानगरपालिका–१२, १३, र १४ मा चरणबद्ध रूपमा अभियान सञ्चालन गर्ने उदेश्य बनाउदै अगि बढिरहेको छ। समितिका अनुसार स्थानीय जनजीवनमा प्रत्यक्ष असर पारिरहेको मध्यवर्ती क्षेत्रले कुनै पनि ठोस लाभ दिन नसकेको, उल्टो समस्या सिर्जना गरिरहेको भन्दै यसको खारेजीको माग गर्दै जनसमर्थन बटुलिने उद्देश्यले अभियान थालिएको हो।
सङ्घर्ष समितिले संकलित हस्ताक्षरहरू सम्बन्धित सरकारी निकायहरूमा बुझाई दबाब सिर्जना गर्ने रणनीति अपनाएको छ। समितिले स्थानीय जनताको आवाजलाई संस्थागत रूपमा सरकार समक्ष पुर्याउने अठोट साथ यो अभियान अघि बढाइरहेको जनाएको छ।
