हेटौंडा, कात्तिक १८ गते । हेटौँडा उपमहानगरपालिकाकी महिला मेयरमाथि आएको बलात्कारको धम्की प्रकरणप्रति सामाजिक अभियन्ता विशालराज महतले घोर भत्सर्ना गरेका छन्। उनले यो घटना कुनै व्यक्ति वा पदमाथिको मात्रै नभई नागरिक सुरक्षामाथिको प्रत्यक्ष चुनौती भएको बताएका छन्।
महतले सामाजिक सञ्जालमा लेख्दै भनेका छन्, “लोकतान्त्रिक समाजमा जनप्रतिनिधि, त्यो पनि एक महिला नेतृत्वकर्तामाथि यस्तो आपराधिक व्यवहार हुनु राज्यको सुरक्षा संयन्त्र र समाजको मानसिक अवस्थाको गम्भीर संकेत हो।”
उनले लोकतन्त्रमा सल्लाह, सुझाव र विरोध स्वाभाविक भए पनि कसैको अस्मितामाथि हमला गर्नु अस्वीकार्य रहेको बताए। उनका अनुसार यस्ता घटनाले सम्पूर्ण समाजको सोच र सभ्यतामाथि प्रश्न उठाउँछन्।
महतले नागरिक समाज, राजनीतिक दल, अभियन्ता र सचेत नागरिक सबैले यस किसिमको आपराधिक मानसिकताको जरा उखेल्न जुट्नुपर्ने आवश्यकता औंल्याएका छन्।
उनले अन्त्यमा भनेका छन्, “यस्ता आपराधिक सोचलाई मौन समर्थन गर्नु समाजको पतनतिरको बाटो हो, त्यसैले सबैले स्पष्ट रूपमा विरोध गर्न जरुरी छ।”
