हेटौडा,जेठ ३ गते । हेटौंडा उपमहानगरपालिका वडा नम्बर–४ का वडाध्यक्ष तथा नेकपा एमाले केन्द्रीय लेखा आयोग सदस्य नवीन सिग्देलले विद्यालय तथा शैक्षिक संस्था बन्द हुँदा विद्यार्थी, अभिभावक र समाजले थप समस्या भोग्नुपरेको बताएका छन्।
आइतबार सामाजिक सञ्जाल फेसबुक मार्फत धारणा सार्वजनिक गर्दै उनले विद्यालय नखुल्ने र पठनपाठन प्रभावित हुने अवस्थाप्रति असन्तुष्टि व्यक्त गरेका हुन्।
सिग्देलले स्थानीय तहले विद्यालय सञ्चालनको विषयमा प्रभावकारी अनुगमन गर्नुपर्ने र विद्यालय नखुल्दा आवश्यक कारवाहीको प्रक्रिया अघि बढाउनुपर्ने धारणा राखेका छन्। उनले शिक्षक पढाउन तयार रहेको, अभिभावक विद्यार्थीलाई विद्यालय पठाउन इच्छुक रहेको तथा विद्यार्थी पनि अध्ययन गर्न तयार रहेको उल्लेख गर्दै यस्तो अवस्थामा विद्यालय बन्द हुनु दुःखद भएको बताएका छन्।
उनले स्वास्थ्य तथा शैक्षिक संस्था बन्द हुँदा नागरिकले प्रत्यक्ष असर भोगिरहेको उल्लेख गर्दै सेवा प्रवाह र शैक्षिक गतिविधि नियमित हुनुपर्नेमा जोड दिएका छन्।
सामाजिक सञ्जालमा सार्वजनिक गरिएको आफ्नो धारणा मार्फत सिग्देलले “विद्यालय खुल्दा, शिक्षकले पढाउँदा र विद्यार्थीले पढ्दा कसले कारवाही गर्छ, अब त्यो हेर्न बाँकी छ” भन्दै वर्तमान परिस्थितिप्रति व्यंग्यात्मक टिप्पणीसमेत गरेका छन्।
