काठमाडौं, भदौ २ । जनता समाजवादी पार्टी नेपाल (जसपा) का केन्द्रीय उपाध्यक्ष विद्युत बज्राचार्यले वर्तमान सरकारमाथि गम्भीर आरोप लगाएका छन्। उनले दुई प्रमुख दल नेपाली कांग्रेस र नेकपा एमालेको गठबन्धन सरकार (एमॅाग्रेस) “दुई दलिय एकात्मक राज्य बनाउने सोंच”का साथ अघि बढिरहेको बताएका छन्।
बज्राचार्यले सामाजिक सञ्जाल फेसबुकमार्फत लेख्दै, भूमि सम्बन्धी विधेयक जसपाले राष्ट्रिय सभाबाट असफल बनाएपछि सरकार “रुष्ट” बनेको र त्यसको बदलाका रूपमा १९ वर्षअघिको ‘गौरकाण्ड’ लाई पुनः उठाएर देशमा अस्थिरता निम्त्याउने कोशिस गरिरहेको आरोप लगाएका छन्।
“जुन भूमि सम्बन्धी विधेयक पास भएको खण्डमा मधेस मात्र होईन, पुरै नेपाली भूमि मरुभूमि बन्ने निश्चित थियो,” उनले भनेका छन्। उनले चुरे दोहनका खतराबाट देशलाई जोगाउन जसपाले विधेयकलाई रोक्न महत्वपूर्ण भूमिका खेलेको जिकिर गरेका छन्।
उनले थप भनेका छन्, “१८ वर्ष अघिनै सम्झौता भइसकेको गौर घटनालाई अहिले फेरि उठाएर सरकार पुनरउत्थानवादी बाटोमा गएको देखिन्छ।”
