सुनसरी,बैशाख ९ गते । सुनसरी जिल्लाको बराहक्षेत्रमा नेपालमै पहिलो पटक सर्पदंश उपचारका लागि औषधि उत्पादन गर्ने उद्योग सञ्चालनमा आएको छ। Anti Snake Venom Serum Research and Manufacturing Pvt. Ltd. नामक उक्त उद्योगले लामो तयारीपछि औपचारिक रूपमा उत्पादन प्रक्रिया अगाडि बढाएको हो।
२०७१ सालमै स्थापना गरिएको यो उद्योगले हालसम्म आवश्यक कानुनी प्रक्रिया, भौतिक पूर्वाधार तथा दक्ष जनशक्तिको व्यवस्थापन पूरा गरिसकेको जनाएको छ। उद्योगले २०८२ सालदेखि पूर्ण रूपमा उत्पादन कार्य सुरु गर्ने लक्ष्यसहित तयारी तीव्र बनाएको छ।
यस संस्थाले सर्पदंशको औषधि उत्पादनका लागि आवश्यक सम्पूर्ण आधारहरू निर्माण गरिसकेको छ। जसअन्तर्गत सर्प पालन, घोडा पालन तथा खरायो पालनका लागि छुट्टाछुट्टै संरचना निर्माण गरिएको छ। साथै, सर्पको विष (भेनम) संकलन तथा अनुसन्धानका लागि अत्याधुनिक प्रयोगशाला पनि तयार गरिएको छ।
उद्योगले नेपालमा पाइने तीन प्रमुख विषालु सर्पहरूको विष संकलन गरी पहिलो पटक स्वदेशमै एन्टिभेनम उत्पादन गर्ने योजना अघि सारेको छ। यसले सर्पदंशका बिरामीलाई सहज र छिटो उपचार उपलब्ध गराउनुका साथै विदेशबाट आयात हुने औषधिमा निर्भरता घटाउने अपेक्षा गरिएको छ।
हाल मेसिनरी आपूर्ति तथा जडानको काम अन्तिम चरणमा रहेको र चाँडै पूर्ण क्षमतामा उत्पादन सुरु हुने उद्योगले जनाएको छ। यस परियोजनाले स्वास्थ्य क्षेत्रसँगै स्थानीय रोजगारी सिर्जनामा समेत सकारात्मक योगदान पुर्याउने विश्वास गरिएको छ।
