हेटौंडा, कात्तिक १८ गते । “महिला भएर जन्मनु गर्वको कुरा हो, तर नेपाली समाजमा महिला भएर बाँच्नु अझै कठिन छ,” — हेटौंडा उपमहानगरपालिकाकी प्रमुख मिना कुमारी लामाले फेसबुकमा लेखेकी छिन्।
उनले हालै सामाजिक सञ्जालमा भावनात्मक स्टाटस लेख्दै, जेनजी आन्दोलनपछि देखिएको समाजको “वास्तविक अनुहार” प्रति गहिरो असन्तुष्टि व्यक्त गरेकी छन्।
मेयर लामाले लेखेकी छन् कि उनले नगरको प्राथमिकता आफ्ना नगरवासीप्रति दिनुपर्ने सामान्य अभिव्यक्ति दिएपछि, केही समूहहरूले उनलाई मधेश प्रदेशको विरोधीका रूपमा चित्रित गर्न खोजे। “फेसबुक र ह्वाट्सएपमा बलात्कार गर्ने धम्कीका सयौं सन्देश आए, राति राति फोन गरेर भेट्ने प्रस्तावहरू पनि आए,” उनले लेखेकी छन्।
उनी भन्छिन् — “एउटा उपमहानगर प्रमुखलाई नै बलात्कार गर्ने धम्की आउँछ भने सामान्य नारीहरू कति सुरक्षित होलान्?”
लामाले आफ्ना नजिकका केही व्यक्तिहरूले नाजायज फाइदा लिन नसकेपछि उनलाई सामाजिक रूपमा अपमानित गर्न खोजेको समेत उल्लेख गरेकी छन्।
त्यसैबीच, हेटौंडा उपमहानगरपालिकाले महिला मैत्री सहर घोषणा गर्ने तयारी गरिरहेको बेला मेयर लामाले उक्त भावनात्मक स्टाटस लेखेकी हुन्। उनले आज मिति २०८२/०७/१८ गते UNOPS सँग महिला मैत्री सहर घोषणा सम्बन्धी सम्झौतामा हस्ताक्षर भएको जनाउँदै यस अभियानलाई महत्वपूर्ण उपलब्धि बताएकी छन्।
लामाले UNOPS का देश निर्देशक कोमल कार्की, सरोज दाहाल, सम्पदा थापा, वडा अध्यक्ष राम थापा, नविन सिग्देल, प्रमुख प्रशासकीय अधिकृत भरत गौतम, इन्जिनियर बिनित ओझा लगायत सम्पूर्ण सहयोगीहरूलाई धन्यवाद दिएकी छन्।
उनले अन्त्यमा लेखेकी छन् — “एउटी नारी बलात्कृत हुन जन्मएकी होइन। एउटी नारीले गरेको गल्तीको सजाय बलात्कार होइन। सहरलाई महिला मैत्री घोषणा गर्नु ठूलो कुरा होइन, नकरात्मक चिन्तनलाई सकारात्मतामा बदल्नु नै साँचो चुनौती हो।”
पृष्ठभूमि: हेटौंडा उपमहानगरपालिकाले हालै लैङ्गिक समानता र महिला सुरक्षालाई प्रमुख प्राथमिकतामा राख्दै सहरलाई महिला मैत्री बनाउने नीति अघि बढाएको छ। उक्त अभियान UNOPS को सहयोगमा कार्यान्वयन हुने जनाइएको छ।
