हेटौंडा, पुस २६ गते । हेटौंडा उपमहानगरपालिकाकी मेयर मिना लामाले हेटौंडालाई नेपाली साहित्यको महत्वपूर्ण केन्द्रका रूपमा विकास गर्ने प्रतिबद्धता व्यक्त गरेकी छन्। ३९ औँ वार्षिकोत्सवको अवसरमा आयोजित साहित्य सङ्गम मकवानपुर तथा तेस्रो राष्ट्रिय पर्याकविता उत्सव–२०८२ का सन्दर्भमा आफ्नो सामाजिक सञ्जालमा स्टाटस सार्वजनिक गर्दै उनले साहित्य, कविता र स्रष्टाप्रति गहिरो सम्मान प्रकट गरेकी हुन्।
मेयर लामाले कविता साहित्यको सबैभन्दा जेठो विधा मात्र नभई आजको समयमा सबैभन्दा बढी लेखिने र पढिने विधा भएको उल्लेख गर्दै कविताले जीवन, समाज, देश र भविष्यलाई समग्र रूपमा प्रतिबिम्बित गर्न सक्नुपर्ने धारणा राखेकी छन्। सरलताका नाममा मनलाग्दी र अटिलताका नाममा अर्थहीन कविता लेखिनु साहित्यका लागि भ्रम सिर्जना गर्ने कार्य भएको उनको टिप्पणी छ।
महाकवि लक्ष्मीप्रसाद देवकोटाका सिर्जनाहरू सधैँ सान्दर्भिक रहने उल्लेख गर्दै उनले देवकोटाको चेतनाले नेपाली समाजलाई गहिरो प्रभाव पारेको बताएकी छन्। साथै, हेटौंडालाई कर्मभूमि बनाएका कालजयी स्रष्टा भीम विराग र उनका गीतहरू नारायणगोपालको स्वरमा अमर बनेको प्रसंग पनि उनले स्मरण गरेकी छन्।
मकवानपुर जिल्लाका समकालीन तथा अग्रज साहित्यकारहरू—डा. निमेष निखिल, साम्भा ढकाल, आरआर चौलागाईं, युग पाठक, छवि अनित्य, डा. तारालाल श्रेष्ठ, अनिता न्यौपाने, शान्तिप्रिय बन्दना लगायतका स्रष्टाहरूको योगदानप्रति गर्व व्यक्त गर्दै मेयर लामाले साहित्य सङ्गम मकवानपुर जस्ता संस्थाहरू र ‘किताब घर’ जस्ता अभियानले हेटौंडालाई साहित्यिक केन्द्रतर्फ उन्मुख गरिरहेको बताएकी छन्।
उनले छिट्टै नै सडक सार्वजनिक निःशुल्क पुस्तकालय निर्माण गर्ने योजना सार्वजनिक गर्दै सरसल्लाहसहित कार्यान्वयनमा लैजाने प्रतिबद्धता व्यक्त गरेकी छन्। राजनीति कर्मसँगै आफू कविता प्रेमी भएको उल्लेख गर्दै मेयर लामाले कविताले सिंगो जीवन बोकेको अनुभूति दिलाउने भएकाले आफूलाई कविता विशेष मन पर्ने बताएकी छन्।
पर्यावरणीय संकट बढिरहेको विश्व सन्दर्भमा पर्यावरण विषयक कविता प्रतियोगिताको महत्व झनै बढेको उल्लेख गर्दै उनले यस्ता कार्यक्रमहरू नेपाली साहित्यका लागि उपलब्धि भएको धारणा राखेकी छन्। साथै, एआई र सामाजिक सञ्जालको प्रभावका बीच पनि लेखन साधनाबाट निखारिनुपर्नेमा उनले जोड दिएकी छन्।
अन्त्यमा, उक्त महत्वपूर्ण कार्यक्रममा सहभागी हुने अवसर प्रदान गरेकोमा आयोजकप्रति धन्यवाद व्यक्त गर्दै मेयर लामाले सहभागी सबै कविहरूको साधना अविरल रहोस् र उनीहरूको सिर्जनाले नेपाली तथा विश्व मानव सभ्यतालाई नयाँ दिशा देओस् भन्ने शुभकामना व्यक्त गरेकी छन्।
