गढी गाउँपालिका,बैशाख ५ गते । गढी गाउँपालिका–३ मा सञ्चालित मनकामना दुग्ध सहकारी संस्था र सम्बन्धित दाना उद्योगमा अनियमितता भएको गम्भीर सूचना सार्वजनिक भएको छ। सेवा सहयोग र आवाज संस्थाका अध्यक्ष तथा सामाजिक अभियान्ता विशालराज महतले आफ्नो सामाजिक सञ्जाल फेसबुकमार्फत उक्त विषय उठान गर्दै छानबिनपछि वास्तविकता सार्वजनिक गर्ने बताएका छन्।
महतले जनताको पसिना र विश्वासमाथि खेलबाड भएको आशंका व्यक्त गर्दै, दोषी जोसुकै भए पनि कारबाहीको दायरामा ल्याउन आफूहरू प्रतिबद्ध रहेको उल्लेख गरेका छन्। उनले तथ्य, प्रमाण र जिम्मेवार पक्षको पहिचानसहित छिट्टै विस्तृत विवरण सार्वजनिक गरिने जानकारी दिएका छन्।
उनका अनुसार, यदि अनियमितता पुष्टि भएमा संलग्न व्यक्तिहरूलाई कानुनी कठघरामा उभ्याउन अन्तिमसम्म लड्ने अडान लिइनेछ। “जनताको पैसा लुट्ने प्रवृत्ति अब सह्य छैन, सत्य बाहिर आउँछ र पर्दाफास हुन्छ,” उनले आफ्नो अभिव्यक्तिमा उल्लेख गरेका छन्।
उक्त आरोप सार्वजनिक भएसँगै स्थानीय स्तरमा चासो र बहस बढेको छ। सम्बन्धित निकायहरूले यस विषयमा छानबिन अघि बढाउने अपेक्षा गरिएको छ। यस घटनाले सहकारी संस्था र उद्योगहरूको पारदर्शिता तथा उत्तरदायित्वमाथि पुनः प्रश्न उठाएको छ।
