हेटौंडा,जेठ १२ गते। पूर्व–पश्चिम राजमार्गअन्तर्गत मकवानपुरको चुरियामाई सडक खण्डमा जथाभावी ओभरटेक गर्ने तथा लेन अनुशासन उल्लंघन गर्ने सवारी साधनमाथि मकवानपुर प्रशासनले कडाइ गरेको छ । दुर्घटना न्यूनीकरण र राजमार्गलाई सुरक्षित बनाउने उद्देश्यले मंगलबार प्रमुख जिल्ला अधिकारी बसन्त अधिकारीको नेतृत्वमा अनुगमन तथा कारबाही अभियान सञ्चालन गरिएको हो ।
प्रमुख जिल्ला अधिकारी अधिकारी, प्रहरी निरीक्षक किशोर आचार्यसहितको टोलीले गरेको अनुगमनका क्रममा लेन अनुशासन पालना नगर्ने तथा जोखिमपूर्ण ढंगले ओभरटेक गर्ने ७ वटा सवारी साधनलाई कारबाही गरिएको छ । उक्त कारबाहीबाट ३० हजार पाँच सय रुपैयाँ राजस्व संकलन भएको प्रशासनले जनाएको छ ।
त्यसैगरी, मंगलबार मात्रै ट्राफिक प्रहरीले विभिन्न नियम उल्लंघन गर्ने ७९ वटा सवारी साधनलाई कारबाही गर्दा एक लाख पाँच सय रुपैयाँ राजस्व संकलन भएको प्रहरी निरीक्षक बच्चुराम फुयाँलले जानकारी दिएका छन् ।
अनुगमनका क्रममा राजमार्गमा धेरै सवारी साधन नम्बर प्लेट बिना वा नम्बर स्पष्ट नदेखिने अवस्थामा सञ्चालन भइरहेको समेत भेटिएको थियो । नम्बर प्लेट मेटिएका १० वटा सवारी साधनलाई कारबाही गर्दै तत्काल नम्बर प्लेट लेखाउन लगाइएको प्रहरीले जनाएको छ ।
यसैबीच जिल्ला प्रहरी कार्यालय मकवानपुरले सार्वजनिक यातायातमा लैंगिक विभेद झल्किने शब्द, वाक्य तथा सामग्री हटाउने अभियान पनि सुरु गरेको छ । सवारी साधनका विभिन्न भागमा लेखिएका विभेदकारी सामग्री हटाउन लगाइएको जिल्ला प्रहरी कार्यालय मकवानपुरले जनाएको छ ।
प्रशासनले राजमार्गमा सुरक्षित यात्रा सुनिश्चित गर्न ट्राफिक नियम कडाइका साथ कार्यान्वयन गरिने भन्दै चालकलाई लेन अनुशासन पालना गर्न र जोखिमपूर्ण ओभरटेक नगर्न आग्रह गरेको छ ।
