काठमाडौँ। काठमाडौं महानगरपालिकाले १८ देखि ५८ वर्ष उमेर समूहका इच्छुक नेपाली नागरिकहरूका लागि विभिन्न ३४ वटा निःशुल्क सीप विकास तालिमहरू सञ्चालन गर्ने भएको छ। आगामी जेठ ७ गते काठमाडौंको टुँडिखेलमा सुरु हुने सीप मेलामा यी तालिमहरू प्रदान गरिने छन्।
महानगरपालिकाले सरकारी तथा गैरसरकारी संस्था, निजी क्षेत्र र दातृ निकायको सहकार्यमा यस वर्ष २०८२ जनालाई तालिम दिने लक्ष्य राखेको छ। काठमाडौंमा स्थायी वा अस्थायी रूपमा बसोवास गर्ने, ल्यान्डफिल साइट प्रभावित क्षेत्रका बासिन्दा, फरक क्षमता भएका व्यक्ति र यसअघि सडकपेटीमा व्यापार गरिरहेका व्यक्तिहरूलाई प्राथमिकता दिइनेछ।
तालिमहरू आईसीटी, स्पेसल एबिलिटी सपोर्ट स्किल, इलेक्ट्रिक्स, गार्मेन्ट्स, कन्स्ट्रक्सन, हस्पिटालिटी, अटोमोबाइल्स, आर्ट एन्ड स्कप्चर, कृषि र सेवा जस्ता विभिन्न १० क्षेत्रमा आधारित हुनेछन्। आईसीटी क्षेत्रमा डिजिटल मार्केटिङ, ड्रोन, रोबोटिक्स, फाइबर अप्टिक्स टेक्निसियन, आर्टिफिसियल इन्टेलिजेन्स (एआई) जस्ता विषय समावेश छन् भने आर्ट एन्ड स्कप्चरमा ज्योतिष र पुरोहित जस्ता परम्परागत सीप पनि समेटिएका छन्।
तालिममा सहभागी हुन इच्छुक व्यक्तिहरूले सीपमेलाको वेबसाइटमा गएर जेठ ५ गतेभित्र आवेदन दिनुपर्नेछ। थप जानकारीका लागि महानगरपालिकाको टोल फ्री नम्बर ११८० मा सम्पर्क गर्न सकिनेछ।
