हेटौंडा, अशोज २९ गते । हेटौंडा–१ चौकिटोलस्थित सार्वजनिक जमिन संरक्षणका लागि चलाइएको न्यायपूर्ण संघर्षका क्रममा प्रहरीले बिना कारण गिरफ्तार गरी झुटा मुद्दामा फसाएको आरोपमा पक्राउ परेका युवा संगठनका सदस्य कमरेड बिजय जिम्बा अदालतबाट एक लाख धरौटीमा रिहा भएका छन्।
नेकपाका जिल्ला इन्चार्ज तथा केन्द्रीय सदस्य राम सीले सामाजिक सञ्जालमार्फत जिम्बाको रिहाइप्रति खुशी व्यक्त गर्दै खुलेआकाशमुनि स्वागत गरेका छन्। उनले प्रहरी प्रशासनले गल्ती बिना दुःख दिने र झुटा प्रमाणका आधारमा मुद्दा चलाउने प्रवृत्तिको आलोचना गर्दै न्यायालयले पनि यस्ता झुटा प्रमाणहरूलाई आधार मानेर सजाय वा धरौटी निर्धारण गर्नु अन्यायपूर्ण भएको बताएका छन्।
राम सीका अनुसार सत्य र न्यायको पक्षमा उभिने युवाहरूलाई कारबाही होइन, सम्मान र सहयोग गर्नुपर्ने संस्कृति बसालिनु आवश्यक छ। उनले निस्वार्थ रूपमा जनहितका काममा लाग्ने युवाहरूप्रति समर्थन जनाउँदै सहयोग गर्ने सबै निकायप्रति आभार व्यक्त गरेका छन्।
