हेटौंडा, कात्तिक १८ गते । लागुऔषध दुर्व्यसन, मदक पदार्थ प्रयोग तथा मानसिक स्वास्थ्य समस्याबाट ग्रस्त व्यक्तिहरूको उपचार, परामर्श र पुनर्स्थापनामा क्रियाशील सिआन पुनर्स्थापना केन्द्रलाई हुलास स्टिल इण्डष्ट्रिज लिमिटेड, सिमरा बाराले स्टिल रूफिङ सिट (जस्ता पाता) सहयोग प्रदान गरेको छ।
कुल ४ हजार वर्गफुट बराबरका २० बन्डल रूफिङ सिट, जसको बजार मूल्य करिब दुई लाख रुपैयाँ बराबर पर्छ, केन्द्रलाई हस्तान्तरण गरिएको हो।
सहयोग सामग्री हस्तान्तरण कार्यक्रम हुलास स्टिल इण्डष्ट्रिज लिमिटेडका प्रशासन प्रमुख रवीन्द्र पण्डितको पहलमा सम्पन्न भएको थियो। उक्त अवसरमा सिआन पुनर्स्थापना केन्द्रका प्रतिनिधि अनुप भुजेल, रोशन सिलवाल, मनिष मान श्रेष्ठ र राहुल सुवेदीले सहयोग सामग्री ग्रहण गरे।
कार्यक्रममा बोल्दै प्रशासन प्रमुख पण्डितले हुलास स्टिल इण्डष्ट्रिज लिमिटेडले आफ्नो कर्पोरेट सामाजिक उत्तरदायित्व (CSR) अन्तर्गत समाजको उत्थान, पुनर्स्थापना र सक्षम समुदाय निर्माणका लागि निरन्तर योगदान दिइरहेको बताए। उनले सिआन पुनर्स्थापना केन्द्रले युवालाई लागुपदार्थको दुरुपयोगबाट मुक्त गर्दै पुनः सकारात्मक जीवनतर्फ उन्मुख गराउने उल्लेखनीय कार्य गरिरहेको भन्दै प्रशंसा व्यक्त गरे।
सिआन पुनर्स्थापना केन्द्रका प्रतिनिधिहरूले हुलास स्टिलको सहयोग संस्थाका लागि महत्वपूर्ण र प्रेरणादायी भएको जनाउँदै आभार व्यक्त गरे। उनका अनुसार, “‘नशामुक्त, स्वस्थ र उत्पादक समाज निर्माण’ गर्ने हाम्रो दीर्घकालीन भिजन साकार पार्न यस्ता सहयोगहरूले थप ऊर्जा र उत्साह प्रदान गर्छन्।”
केन्द्रका कर्मचारी अनुप भुजेलले भने, “सिआनको उद्देश्य केवल उपचारमा सीमित छैन; हामी प्रत्येक व्यक्तिलाई अवसर, आशा र सम्मानको वातावरण दिलाउँदै समाजमा पुनर्जागरण र आत्मपरिवर्तनको बाटोमा अघि बढाउने लक्ष्यका साथ काम गरिरहेका छौँ।”
त्यस्तै, मनिष मान श्रेष्ठले सहयोगले केवल भौतिक संरचना सुदृढीकरणमा मात्र नभई समाजमा साझा जिम्मेवारी र सकारात्मक सहकार्यको सन्देश प्रेषण गरेको बताए। रोशन सिलवालले पनि हुलास स्टिलप्रति आभार व्यक्त गर्दै भने, “यो सहयोग केवल सामग्रीको समर्थन होइन, हाम्रो मिशनप्रति विश्वास र उत्प्रेरणाको प्रतीक हो।”
विगत एक दशकदेखि क्रियाशील सिआन पुनर्स्थापना केन्द्रले लागुपदार्थ प्रयोगकर्ताहरूको उपचार, परामर्श, पुनर्स्थापना र सामाजिक पुनःएकीकरणका कार्यक्रमहरू निरन्तर सञ्चालन गर्दै आएको छ।
