हेटौंडा, पुस २ गते । फेसबुकको माउ कम्पनी मेटाले नेपाललाई फेसबुक कन्टेन्ट मोनिटाइजेसन सुविधाबाट हटाएको छ। मेटाले फेसबुक प्रयोगकर्ताहरूलाई सूचना जारी गर्दै सरकारी कानुनी अनुरूपको आवश्यकता जनाउँदै नेपालमा मोनिटाइजेसन सुविधा सीमित गरिएको जनाएको हो।
मेटाको यो निर्णयसँगै नेपालका हजारौँ फेसबुक कन्टेन्ट क्रिएटरहरूले डिजिटल प्लेटफर्ममार्फत आय आर्जन गर्ने अवसर गुमाएका छन्। पछिल्ला वर्षहरूमा फेसबुक, इन्स्टाग्राम जस्ता सामाजिक सञ्जाललाई आम्दानीको मुख्य स्रोत बनाउँदै आएका नेपाली क्रिएटरहरूका लागि यो निर्णय ठूलो झट्का बनेको छ।
उता, यस विषयमा नेपाल सरकारको सञ्चार तथा सूचना प्रविधि मन्त्रालय भने पूर्ण रूपमा बेखबर देखिएको छ। मन्त्रालयका सम्बन्धित निकायले मेटाको निर्णयबारे कुनै औपचारिक जानकारी प्राप्त नभएको बताएका छन्।
डिजिटल अर्थतन्त्रको विस्तारसँगै कन्टेन्ट क्रिएसनलाई रोजगारी र आयको माध्यम बनाउँदै आएका युवाहरूका लागि यो निर्णयले निराशा थपेको छ। विज्ञहरूले भने सरकार र मेटाबीच स्पष्ट कानुनी तथा नीतिगत समन्वय नहुँदा यस्ता समस्या दोहोरिन सक्ने चेतावनी दिएका छन्।
फेसबुक मोनिटाइजेसन बन्द भएसँगै अब नेपालका कन्टेन्ट क्रिएटरहरूले वैकल्पिक प्लेटफर्म खोज्नुपर्ने वा सरकारको पहलमार्फत मेटासँग संवाद अघि बढाउनुपर्ने आवश्यकता देखिएको छ।
