हेटौडा, पुस २४ गते । लामो समयदेखि सांगीतिक क्षेत्रमा संघर्षरत मकवानपुरे गायक सोयल लामा आठ वर्षपछि पुनः संगीत क्षेत्रमा सक्रिय भएका छन्। मकवानपुर जिल्लाको बकैया गाउँपालिका–३, हात्तिसुडे स्थायी निवासी लामा नयाँ गीतसहित दर्शक–श्रोतामाझ फर्किएका हुन्।
उनको नयाँ गीत चर्चित गायिका जितु लोप्चनसँगको सहकार्यमा बजारमा आइसकेको छ। हाल यु.ए.ई.लाई कर्मथलो बनाउँदै आएका लामा सानै उमेरदेखि आफ्नो कला, धर्म, संस्कार र संस्कृतिको संरक्षण तथा प्रवर्द्धनमा निरन्तर लागिपरेका कलाकारका रूपमा चिनिन्छन्।
आउँदो ल्होछारको अवसरलाई लक्षित गर्दै उनले आधा दर्जनभन्दा बढी नयाँ गीत सार्वजनिक गर्ने तयारी पूरा भइसकेको जानकारी दिएका छन्। दर्शक–श्रोताका लागि छिट्टै नयाँ–नयाँ सांगीतिक कोसेली ल्याउने तयारीमा रहेको उनको भनाइ छ।
लामो अन्तरालपछि पुनः सक्रिय भएका गायक सोयल लामाको यो पुनरागमनले मकवानपुरसहित तामाङ सांगीतिक क्षेत्रमा नयाँ ऊर्जा थप्ने अपेक्षा गरिएको छ।
