हेटौंडा, माघ १२ गते । फागुन २१ गते हुने प्रतिनिधिसभा सदस्य निर्वाचनका लागि गुलाफ चुनाव चिह्नसहित नेकपा (माओवादी) मकवानपुर चुनावी प्रतिस्पर्धामा उत्रिएको छ । पार्टीको केन्द्रीय निर्णयअनुसार मकवानपुर जिल्लाबाट प्रत्यक्षतर्फ दुई जना र समानुपातिकतर्फ एक गरी तीन जनाको उम्मेदवारी दर्ता गरिएको छ ।
प्रतिनिधिसभा सदस्य निर्वाचन अन्तर्गत मकवानपुर क्षेत्र नम्बर १ बाट महेश नेपाली (आरोह) र क्षेत्र नम्बर २ बाट राम घलान (वाटर) ले उम्मेदवारी दिएका छन् । त्यस्तै, समानुपातिक तर्फ सुशीला सिंतान उम्मेदवार बनेकी छन् ।
लामो समयसम्म संसदीय व्यवस्थाको विरोध गर्दै निर्वाचन बहिष्कार गर्दै आएको नेकपा विप्लव समूहले यसपटक नेकपा (माओवादी) नाम दर्ता गरी गुलाफ चुनाव चिह्नसहित चुनावी राजनीतिमा प्रवेश गरेको हो । जनसत्ताको निर्माण र समाजवादी व्यवस्थाको स्थापनाका लागि संघर्ष गर्दै आएको पार्टीले अब परिवर्तनको अभियानलाई संसदमार्फत अघि बढाउने लक्ष्य लिएको जनाएको छ ।
मकवानपुर क्षेत्र नम्बर २ बाट उम्मेदवारी दिएका जिल्ला इन्चार्ज तथा केन्द्रीय सदस्य राम घलानले संघर्षको मोर्चाबाट मात्रै नभई अब चुनावी मोर्चाबाट पनि परिवर्तन सम्भव हुने विश्वास व्यक्त गरेका छन् । विद्यार्थी राजनीतिबाट आफ्नो राजनीतिक यात्रा सुरु गरेका उनले भ्रष्टाचारको अन्त्य, समाजवादको स्थापना र जनताको जीवनस्तर उकास्न गुलाफ चुनाव चिह्न लिएर मैदानमा आएको बताए ।
त्यसैगरी मकवानपुर क्षेत्र नम्बर १ का उम्मेदवार महेश नेपाली (आरोह) लामो समयदेखि कलासंस्कृति र राजनीतिक आन्दोलनमा सक्रिय छन् । एकीकृत जनक्रान्तिका घाइतेसमेत रहेका आरोहले पूर्वी मकवानपुरको उज्यालो भविष्य निर्माणका लागि गुलाफ चिह्नसहित चुनावी प्रतिस्पर्धामा उत्रिएको बताएका छन् ।
समानुपातिक उम्मेदवार सुशीला सिंतान पनि विगतदेखि नै राजनीतिक आन्दोलन र समाजसेवामा क्रियाशील रहँदै आएकी छन् । उनले जनताको वास्तविक समस्या, विशेषतः महिलामाथि हुने अन्याय र पीडाको अन्त्य गर्दै मकवानपुरको समग्र विकासमा योगदान पुर्याउने प्रतिबद्धता व्यक्त गरिन् ।
हेटौंडा–११, थानाभर्याङस्थित निर्वाचन कार्यालयमा उम्मेदवारी दर्ताका क्रममा नेकपा (माओवादी) मकवानपुर र्यालीसहित उपस्थित भएको थियो । उम्मेदवारी दर्तापछि पार्टी नेता–कार्यकर्ता र स्थानीय जनसमुदायले उम्मेदवारहरूलाई गुलाफको फूल, माला र अबिर लगाएर स्वागत गर्दै जितको अग्रिम शुभकामना व्यक्त गरेका थिए ।
