हेटौँडा, फागुन १६ गते । मकवानपुर प्रतिनिधिसभा क्षेत्र नम्बर–१ मा चुनावी माहोल क्रमशः नेपाली कम्युनिस्ट पार्टीको पक्षमा ढल्कँदै गएको देखिएको छ। निर्वाचन नजिकिँदै जाँदा नेपाली कांग्रेस र नेपाल कम्युनिस्ट पार्टी (एमाले) परित्याग गरी नेकपामा प्रवेश गर्ने स्थानीयको संख्या उल्लेखनीय रूपमा बढेको पार्टीले जनाएको छ।
विशेषगरी मकवानपुर–१ अन्तर्गत बागमती गाउँपालिका–५ बगेरीको माझी बस्तीमा देखिएको दल परिवर्तनले चुनावी चर्चा थप तातेको छ। शुक्रबार आयोजित चुनावी सभामा प्रतिनिधिसभा सदस्य उम्मेदवार विजय गौतम तथा पार्टीका केन्द्रीय सदस्य प्रेमबहादुर पुलामी ‘छिन्तु’ले नवप्रवेशीहरूलाई पार्टीमा स्वागत गरेका थिए।
यसै क्रममा बागमती गाउँपालिका–६ कायरमा आयोजित भेटघाट तथा चुनावी सभामा स्थानीयवासीले उम्मेदवार गौतमप्रति खुला समर्थन जनाए। त्यस्तै, वडा नम्बर–८ शान्तीपुरमा घरदैलो भेटघाटसँगै मोटरसाइकल र्याली सम्पन्न भयो भने वडा नम्बर–७ पथिभरामा भएको सभामा ठूलो संख्यामा शुभेच्छुकहरूको उपस्थिति रहेको थियो।
शुक्रबारकै दिन नेकपाले फापरबारी बजार, शान्तीपुर, झुर्झुरे, बगेरी, बाख्रे, लामीटार र रातोमाटे लगायतका स्थानमा भेटघाट तथा चुनावी सभा सञ्चालन गरेको थियो। उम्मेदवार गौतमसहितको टोलीले फापरबारी बजारमा मतदातासँग घरदैलो भेटघाटसमेत गर्दै उत्साहजनक समर्थन प्राप्त गरेको जनाइएको छ। यस्तै बागमती गाउँपालिका–६ अर्नादमारमा पनि टोलभेला र घरदैलो कार्यक्रम सम्पन्न भएको छ।
उम्मेदवार विजय गौतमले आफ्नो जित सुनिश्चित रहेको दाबी गर्दै केही दिनअघि सार्वजनिक गरेको प्रतिबद्धतापत्र कार्यक्रममा २६ देखि २७ सय मतको अन्तरले चुनाव जित्ने विश्वास व्यक्त गरेका थिए।
