हेटौँडा, चैत ३ गते । विशालराज महतले प्रदूषण नियन्त्रणमा सरकारको निष्क्रियताप्रति कडा असन्तुष्टि व्यक्त गरेका छन्। उनले सामाजिक सञ्जाल फेसबुकमार्फत सार्वजनिक गरेको स्टाटसमा जनताको स्वास्थ्यसँग खेलवाड भइरहेको आरोप लगाउँदै सरकारलाई तत्काल प्रभावकारी कदम चाल्न चेतावनी दिएका छन्।
उनले दिनको समयमा मुख्यमन्त्री कार्यालयमा बैठक र छलफल हुने तर बेलुका उद्योगहरूबाट धुलो–धुवाँ उत्सर्जन जारी रहनुले सरकार र उद्योगबीच ‘सेटिङ’ भएको आशंका व्यक्त गरेका छन्। समितिहरू गठन गरेर मात्र समस्या समाधान नहुने भन्दै उनले यस्ता गतिविधि अर्थहीन बन्दै गएको टिप्पणी गरेका छन्।
महतले कागजमा निर्णय गरेर व्यवहारमा कार्यान्वयन नगर्ने प्रवृत्तिले जनतालाई मूर्ख ठानिएको संकेत गरेको बताएका छन्। उनले उद्योगहरूको ध्यानाकर्षण गराउने कार्य बारम्बार दोहोर्याइँदा पनि ठोस सुधार नआएको भन्दै जनताको धैर्यको परीक्षा नलिन आग्रह गरेका छन्।
उनका अनुसार जनताको स्वास्थ्यभन्दा माथि कुनै पनि उद्योग वा व्यक्तिगत स्वार्थ हुन नसक्ने भन्दै प्रदूषण नियन्त्रणमा तुरुन्त कडाइ गर्नुपर्ने आवश्यकता औंल्याएका छन्। अन्यथा आन्दोलन, घेराउ, उजुरी र कानुनी कारबाही एकसाथ सुरु हुने चेतावनी दिएका छन्।
अन्त्यमा उनले “जनता चुप लागेर बसेको हो, सकिएको होइन” भन्दै सरकारलाई समयमै जिम्मेवार बन्न आग्रह गरेका छन्।
