हेटौँडा, चैत ६ गते । राष्ट्रिय विपत जोखिम न्यूनीकरण तथा व्यवस्थापन प्राधिकरणले हिजो जारी गरेको चेतावनीअनुसार आज देशका विभिन्न स्थानमा प्रतिकूल मौसम देखिएको छ। सोही मौसमी प्रणालीको प्रभाव मकवानपुर जिल्लाको हेटौडामा पनि प्रत्यक्ष रूपमा परेको छ।
हावाहुरी, बतास, असिना तथा वर्षासहित आएको तीव्र मौसमी वायु प्रणालीका कारण हेटौडाको जनजीवन प्रभावित बनेको छ। विशेषगरी हेटौडामा गत फागुन २९ गतेदेखि सञ्चालनमा रहेको दोस्रो बृहत खेलकुद, कृषि तथा पर्यटन महोत्सव २०८२ मा पनि यसको असर देखिएको छ।
मेला प्राङ्गण आसपासका विभिन्न टहरा तथा आकर्षणका संरचना, विशेषगरी ‘लन्डन ब्रिज’ मा क्षति पुगेको देखिएको छ। खराब मौसमकै कारण आजका लागि तय गरिएको चर्चित लोकदोहोरी गायिका ज्योति मगरको विशेष सांगीतिक प्रस्तुति पनि स्थगित गरिएको आयोजकले जनाएको छ।
यसैबीच, हावाहुरीका कारण मकवानपुरका विभिन्न स्थानमा सडक किनारका रुखहरू ढल्नुका साथै घरका जस्तापाता उडेको र केही विद्युत पोलमा समेत क्षति पुगेको छ। यसले गर्दा हेटौडाका स्थानीय बासिन्दाले केही समय विद्युत अवरोधको समस्या भोग्नुपरेको थियो। यद्यपि हाल विद्युत सेवा पुनः नियमित रूपमा सञ्चालनमा आएको छ।
राष्ट्रिय विपत जोखिम न्यूनीकरण तथा व्यवस्थापन प्राधिकरणले आगामी दुई दिनसम्म यस्तै प्रतिकूल मौसम रहने सम्भावना रहेको भन्दै नागरिकलाई सतर्क रहन आग्रह गरेको छ।
