काठमाडौं, चैत १३ गते । नेपालका पूर्व प्रधानमन्त्री बाबुराम भट्टराईले युवा पुस्ताको नेतृत्वप्रति विश्वास व्यक्त गर्दै बालेन्द्र शाहलाई सफल कार्यकालको शुभकामना दिएका छन्।
सामाजिक सञ्जाल मार्फत व्यक्त गरिएको आफ्नो धारणा सार्वजनिक गर्दै भट्टराईले नेपाली इतिहासकै कान्छा तथा मधेसी मूलका पहिलो प्रधानमन्त्रीका रूपमा शाहले ऐतिहासिक जिम्मेवारी वहन गर्न लागेको उल्लेख गरेका छन्।
उनले आन्तरिक रूपमा लामो समयदेखि संरचनात्मक गत्यावरोधमा फसेको अर्थ–राजनीतिक अवस्था तथा बाह्य रूपमा तीव्र गतिमा परिवर्तन भइरहेको भू–राजनीतिक परिस्थितिबीच सन्तुलित र कुशल व्यवस्थापन आवश्यक रहेको औंल्याएका छन्। भट्टराईले यी चुनौती र सम्भावनालाई अवसरमा रूपान्तरण गर्दै देश र जनताका एक्काइसौँ शताब्दीका आकांक्षा पूरा गर्न सफल हुने विश्वास व्यक्त गरेका छन्।
पूर्व प्रधानमन्त्री भट्टराईले लामो लोकतान्त्रिक संघर्षपछि नेपाल सुशासन र समावेशी समृद्धिको नयाँ चरणमा प्रवेश गरेको उल्लेख गर्दै अब राजनीतिक नेतृत्व समयानुकूल रूपान्तरण हुनुपर्ने बताएका छन्। उनले डिजिटल प्रविधि तथा कृत्रिम बुद्धिमत्ता (एआई) मैत्री युवा पुस्तामा नेतृत्वको पुस्तान्तरण भइरहेको वस्तुगत यथार्थलाई आत्मसात गर्न सबैलाई आग्रह गरेका छन्।
यसैगरी, उनले कसैको देवत्वकरण वा दानवीकरण नगरी गुण–दोषका आधारमा सहकार्य तथा स्वस्थ प्रतिस्पर्धा गर्ने नयाँ लोकतान्त्रिक संस्कृतिको विकास गर्नुपर्नेमा जोड दिएका छन्।
भट्टराईको उक्त धारणा सामाजिक सञ्जालमा व्यापक रूपमा चर्चा भइरहेको छ, जहाँ धेरैले यसलाई युवा नेतृत्वप्रति विश्वास र नयाँ राजनीतिक संस्कृतिको आह्वानका रूपमा लिएका छन्।
