हेटौंडा, चैत १५ गते । पूर्व प्रधानमन्त्री तथा नेपाल कम्युनिष्ट पार्टी (एमाले) का अध्यक्ष केपी शर्मा ओली पक्राउ परेपछि देशभर एमालेले आन्दोलनलाई तीव्र बनाएको छ। सोही क्रममा हेटौंडामा पनि यसको प्रभाव देखिएको छ।
आज हेटौंडाका विभिन्न स्थानहरूमा एमाले समर्थक कार्यकर्ताहरू सडकमा उत्रिएका छन्। उनीहरूले पार्टीको झण्डा बोकेर ओलीको तत्काल रिहाइको माग गर्दै प्रदर्शन गरेका हुन्।
आन्दोलनका क्रममा कार्यकर्ताहरूले वर्तमान सरकारप्रति असन्तुष्टि जनाउँदै गृहमन्त्री सुदन गुरुङको राजीनामा समेत माग गरेका छन्। प्रदर्शनकारीहरूले “राजनीतिक प्रतिशोध बन्द गर”, “गृहमन्त्री राजीनामा दे”, “एमाले जिन्दाबाद” जस्ता नाराबाजी गर्दै शहरका विभिन्न सडक परिक्रमा गरेका थिए।
एमालेका केन्द्रीय लेखा आयोग सदस्य नवीन सिग्देलले हिजो नै सामाजिक सञ्जालमार्फत आजको आन्दोलनबारे जानकारी गराएका थिए। उनले पार्टीको केन्द्रीय सचिवालयको निर्देशनअनुसार देशभरका जिल्ला प्रशासन कार्यालयमा प्रदर्शन सहित ज्ञापनपत्र बुझाउने कार्यक्रम रहेको बताएका थिए।
सोही कार्यक्रमअन्तर्गत हेटौंडामा पनि ज्ञापनपत्र बुझाउने तथा विरोध प्रदर्शन गर्ने गतिविधि गरिएको हो। एमाले समर्थकहरूले ओलीको गिरफ्तारीलाई गैरसंवैधानिक र प्रतिशोधपूर्ण भन्दै तत्काल रिहाइको माग गरेका छन्।
आज बिहान ११ बजेदेखि सुरु भएको आन्दोलन हेटौंडाका विभिन्न सडकहरूमा व्यापक रूपमा देखिएको थियो।
