काठमाडौँ, चैत १६ गते । महेश बस्नेतले सामाजिक सञ्जालमार्फत आज दिउँसो १ बजे माइतीघर मण्डलमा आयोजना हुने सशक्त विरोध कार्यक्रममा सहभागी हुन सबैलाई आह्वान गरेका छन्।
नेपाल कम्युनिष्ट पार्टी (एमाले) का सचिव बस्नेतले वर्तमान सरकारको शैलीप्रति असन्तुष्टि जनाउँदै आन्दोलनमा व्यापक सहभागिता आवश्यक रहेको बताएका छन्। उनले केपी शर्मा ओली माथि गरिएको भनिएको गिरफ्तारीलाई “प्रतिशोधपूर्ण” कदमको संज्ञा दिएका छन्।
बस्नेतले आफ्नो स्टाटसमार्फत वर्तमान सरकार अधिनायकवादी र निरंकुश ढंगले अघि बढिरहेको आरोप लगाउँदै कथित गृहमन्त्रीका गतिविधिहरूलाई अराजक बताएका छन्।
एमाले राजधानी प्रदेश कमिटीको आयोजनामा हुने उक्त प्रदर्शनमा पार्टीका नेता, कार्यकर्ता तथा सर्वसाधारणलाई सशक्त रूपमा उपस्थित हुन आग्रह गरिएको छ। बस्नेतले “आन्दोलनको मोर्चामा भेट हुनेछ” भन्दै विरोधलाई थप तीव्र बनाउने संकेत दिएका छन्।
यस विरोध प्रदर्शनले राजधानीको राजनीतिक वातावरण थप तातिने अपेक्षा गरिएको छ।
