हेटौंडा, चैत २२ गते । जिल्ला प्रशासन कार्यालय मकवानपुरले नेपाल सरकार मन्त्रिपरिषद्को निर्णय अनुसार नयाँ कार्यालय समय लागू गरेको छ। मन्त्रिपरिषद्को आज चैत्र २२ गते बसेको बैठकले अब आउने चैत्र २३ गतेदेखि लागू हुने गरी सरकारी कार्यालयहरूको समय बिहान ९ बजेदेखि साँझ ५ बजेसम्म कायम गर्ने तथा शनिबार र आइतबार दुई दिन सार्वजनिक बिदा दिने निर्णय गरेको हो।
उक्त निर्णय बमोजिम जिल्ला प्रशासन कार्यालय मकवानपुरले सेवा प्रवाहको व्यवस्था मिलाइसकेको जनाएको छ। कार्यालयद्वारा जारी सूचनामा सबै सेवाग्राही तथा सरोकारवालाहरूलाई नयाँ समय तालिका अनुसार सेवा लिन आग्रह गरिएको छ।
यसैगरी, जिल्लाभित्र रहेका सबै तहका सरकारी निकायहरूलाई पनि मन्त्रिपरिषद्को निर्णय कार्यान्वयन गर्न निर्देशन दिइएको छ। कार्यालयले सम्बन्धित निकायहरूलाई सोही अनुरूप सेवा प्रवाहको व्यवस्था मिलाउन अनुरोध गरेको छ।
जिल्ला प्रशासन कार्यालय मकवानपुरका प्रशासकीय अधिकृत सरोज प्रसाद पौडेलद्वारा जारी सूचनामा सेवाको प्रभावकारिता र समय व्यवस्थापनलाई ध्यानमा राख्दै नयाँ व्यवस्था लागू गरिएको उल्लेख गरिएको छ।
