काठमाडौं,बैशाख २२ गते । भौतिक पूर्वाधार तथा यातायात मन्त्रालयले मातहतका सबै आयोजना तथा ठेक्का कार्यहरूलाई द्रुत गतिमा अगाडि बढाउन कडा निर्देशन जारी गरेको छ। मन्त्रालयका सचिव गोपाल प्रसाद सिग्देलद्वारा जारी निर्देशनमा निर्माण प्रगति, स्रोत परिचालन र प्रभावकारी कार्यान्वयनलाई उच्च प्राथमिकतामा राख्दै सम्बन्धित निकायहरूलाई सक्रिय भूमिका निर्वाह गर्न भनिएको हो।
निर्देशन अनुसार निर्माण सामग्रीको उपलब्धता सुनिश्चित गर्न स्थानीय तह र जिल्ला प्रशासन कार्यालयसँग नियमित समन्वय गर्नुपर्नेछ। यदि निर्माण सामग्री, विशेषगरी इन्धन र बिटुमिनको अभाव भएमा तत्काल मन्त्रालयलाई जानकारी गराउन भनिएको छ।
त्यस्तै, ठेक्का सम्झौतामा रहेको व्यवस्था अनुसार मूल्य समायोजन प्रक्रिया तत्काल कार्यान्वयनमा ल्याउनुपर्ने उल्लेख गरिएको छ। कार्यान्वयनमा समस्या आएमा मन्त्रालयमा प्रतिवेदन पठाई सहजीकरण माग्न सकिनेछ।
मन्त्रालयले आयोजना निर्देशक, सुपरिटेन्डिङ इन्जिनियर, डिभिजन तथा योजना प्रमुखहरूलाई आफ्नो कार्यक्षेत्रमा सक्रिय भई काम गर्न र मातहतका कर्मचारीलाई प्रभावकारी रूपमा परिचालन गर्न निर्देशन दिएको छ। साथै, आयोजनाको प्रगति विवरण नियमित रूपमा भर्चुअल माध्यम, विशेषगरी WhatsApp समूहमार्फत मन्त्रालयमा पठाउने व्यवस्था मिलाउन भनिएको छ।
निर्माण कार्यमा कुनै अवरोध आएमा समाधानसहित लिखित रूपमा मन्त्रालयलाई जानकारी गराउनुपर्नेछ। यदि कुनै आयोजनाबाट प्रगति विवरण प्राप्त नभएमा सम्बन्धित प्रमुखलाई जिम्मेवार बनाइने चेतावनी पनि दिइएको छ।
मन्त्रालयले ठेक्काका सर्त अनुसार निर्धारित समयभित्र काम सम्पन्न गर्न निर्माण व्यवसायीबाट स्रोत परिचालन योजना अनिवार्य रूपमा लिने र त्यसको कडाइका साथ अनुगमन गर्ने जनाएको छ। आवश्यक परेमा करारीय कारबाही समेत गरिने उल्लेख गरिएको छ।
निर्माण स्थलमा अपेक्षित प्रगति नभएमा सम्बन्धित कार्यालय प्रमुखलाई जिम्मेवार बनाइने व्यवस्था पनि गरिएको छ। विभागीय प्रमुखहरूलाई यी निर्देशनहरू कार्यान्वयन गराउने जिम्मेवारी दिइएको छ।
मन्त्रालयले निर्देशनहरूको पालना गरी कार्यान्वयनको अवस्था नियमित रूपमा जानकारी गराउन सबै निकायलाई आग्रह गरेको छ।
