काठमाडौं,जेठ ८ गते। सरकारले इस्लाम धर्मावलम्बीहरूको महान पर्व बकर ईद (ईद उल अज्हा) का अवसरमा आगामी २०८३ साल जेठ १४ गते बिहीबार सार्वजनिक विदा दिने निर्णय गरेको छ।
गृह मन्त्रालयले शुक्रबार जारी गरेको विज्ञप्तिअनुसार नेपाल राजपत्रमा २०८२ फागुन १८ गते प्रकाशित सूचनाबमोजिम बकर ईदका दिन सार्वजनिक विदा दिने व्यवस्था रहेको उल्लेख गर्दै मुस्लिम आयोगबाट प्राप्त जानकारीका आधारमा जेठ १४ गते पर्व परेको पुष्टि भएकाले उक्त दिन सार्वजनिक विदा हुने जनाएको हो।
मन्त्रालयका सह-सचिव तथा प्रवक्ता आनन्द काफ्लेले जारी गरेको विज्ञप्तिमा स्वदेश तथा विदेशमा रहेका सम्पूर्ण इस्लाम धर्मावलम्बीहरूलाई बकर ईदको शुभकामना व्यक्त गरिएको छ। साथै सम्पूर्ण नेपाली दिदीबहिनी तथा दाजुभाइहरूमा पनि मन्त्रालयले शुभकामना व्यक्त गरेको छ।
बकर ईद मुस्लिम समुदायको महत्वपूर्ण धार्मिक पर्वका रूपमा मनाइन्छ। यस अवसरमा मुस्लिम समुदायले नमाज अदा गर्ने, कुर्बानी दिने तथा आपसी सद्भाव र सहयोग साटासाट गर्ने परम्परा रहेको छ।
