हेटौंडा,जेठ १२ गते। देशका विभिन्न क्षेत्रमा मेघगर्जन, चट्याङसहित तीव्र गतिको हावाहुरी चल्ने सम्भावना बढिरहेको अवस्थामा हेटौंडा उपमहानगरपालिका कार्यालयले मकवानपुरवासीलाई आवश्यक सतर्कता अपनाउन आग्रह गरेको छ। मौसमको प्रतिकूल अवस्थाले धनजनको क्षति हुन सक्ने भन्दै उपमहानगरपालिकाले जरुरी सूचना जारी गरेको हो।
जारी सूचनाअनुसार हावाहुरी सुरु हुनुअघि घर बाहिर रहेका उडाउन सक्ने सामानहरू सुरक्षित स्थानमा राख्न, कौसी, बार्दली तथा आँगनका सामग्री बाँधेर सुरक्षित गर्न र घरका झ्यालढोका मजबुत रूपमा बन्द गर्न अनुरोध गरिएको छ।
त्यस्तै, हावाहुरी चलिरहेको समयमा अत्यावश्यक कामबाहेक घर बाहिर वा खुला स्थानमा ननिस्किन, रूख, बिजुलीका पोल, होर्डिङ बोर्ड तथा कमजोर संरचनाको ओत नलिन उपमहानगरपालिकाले सचेत गराएको छ। यात्रा गरिरहेका सवारी चालकलाई सुरक्षित स्थानमा गाडी रोकी भित्रै बस्न तथा चट्याङको जोखिमलाई ध्यानमा राख्दै विद्युतीय उपकरणहरूको प्लग निकाल्न पनि आग्रह गरिएको छ।
हावाहुरीपछि जमिनमा खसेका वा चुडिएका बिजुलीका तार नछुन तथा त्यस्ता अवस्थाबारे तत्काल विद्युत प्राधिकरणलाई जानकारी गराउन भनिएको छ। साथै, छिमेकमा कसैलाई चोटपटक लागेको अवस्थामा सुरक्षित रूपमा प्राथमिक उपचार गर्न वा नजिकको स्वास्थ्य संस्थामा पुर्याउन अनुरोध गरिएको छ।
उपमहानगरपालिकाले आपत्कालीन अवस्थामा नजिकको प्रहरी कार्यालय वा इमर्जेन्सी नम्बर १०० मा सम्पर्क गर्न समेत आग्रह गरेको छ।
