चित्लाङ,जेठ १२ गते। हेटौँडा र काठमाडौँलाई छोटो दूरीमार्फत जोड्ने चित्लाङ–थानकोट सडकखण्ड आगामी जेठ १७ गतेदेखि ३० गतेसम्म पूर्ण रूपमा बन्द गरिने भएको छ । सडक निर्माण तथा स्तरोन्नति कार्यलाई तीव्रता दिन १४ दिनका लागि उक्त सडकखण्डमा सवारी आवागमन रोक्न लागिएको हो ।
सडक डिभिजन कार्यालय काठमाडौँका अनुसार सडकको विभिन्न भागमा कालोपत्रे, ढल व्यवस्थापन, पहिरो नियन्त्रण तथा सडक विस्तारको काम एकसाथ अघि बढाइएकाले सुरक्षाका कारण केही समय सडक बन्द गर्नुपरेको जनाएको छ ।
यो सडक हेटौँडा–काठमाडौँ यात्रा गर्ने सवारी साधनका लागि छोटो र वैकल्पिक मार्गका रूपमा प्रयोग हुँदै आएको छ । सडक बन्द अवधिमा यात्रु तथा सवारी चालकलाई अन्य वैकल्पिक मार्ग प्रयोग गर्न कार्यालयले आग्रह गरेको छ ।
विशेष गरी दैनिक आवतजावत गर्ने यात्रु, मालवाहक सवारी तथा पर्यटकलाई यात्रा अघि सडक अवस्थाबारे जानकारी लिएर मात्र यात्रा गर्न सुझाव दिइएको छ । निर्माण कार्य निर्धारित समयमै सम्पन्न भएमा जेठ ३० गतेपछि सडक पुनः सञ्चालनमा ल्याइने सडक डिभिजनले जनाएको छ ।
