काठमाडौं, कात्तिक १८ गते । अरब सागरमा विकसित मौसमी प्रणाली र पश्चिमी वायुको सक्रियताका कारण देशको अधिकांश भागमा पुनः बदली भएको छ। केही दिन अगाडि खुलेको मौसम फेरि मन्द पश्चिमी वायुको प्रभावले क्रमशः सुदूरपश्चिमदेखि काठमाडौँ उपत्यकासम्म असर पार्दै गएको मौसम पूर्वानुमान महाशाखाले जनाएको छ।
आज बिहानदेखि सुदूरपश्चिम क्षेत्रबाट शुरू भएको पश्चिमी वायु क्रमशः कर्णाली, गण्डकी हुँदै बागमती प्रदेशसम्म फैलिँदै गएको छ। बाजुरा, रुकुम, मनाङ लगायतका जिल्लामा हल्का वर्षा भइरहेको छ भने गण्डकी, कर्णाली र सुदूरपश्चिमका उच्च पहाडी तथा हिमाली क्षेत्रमा सामान्यदेखि मध्यम स्तरको हिमपात भइरहेको छ।
मौसम पूर्वानुमान महाशाखाका अनुसार यसपटकको पश्चिमी वायुको प्रभाव कमजोर भएकाले ठूलो वर्षा वा व्यापक हिमपातको सम्भावना भने छैन। तर उच्च हिमाली क्षेत्रमा पदयात्रा, आरोहण तथा भ्रमणका क्रममा सावधानी अपनाउन मौसमविद्हरूले सुझाव दिएका छन्।
“माथिल्लो क्षेत्रमा भोलिसम्मको लागि यात्रामा नजाने तथा आवश्यक सावधानी अपनाउन सुझाव दिइन्छ,” एक मौसमविद्ले बताएका छन्।
महाशाखाका अनुसार पश्चिमी वायुको प्रभाव भोलि बेलुकादेखि क्रमशः कमजोर हुँदै जाने र केही दिनभित्र देशभर मौसम खुल्ने अनुमान गरिएको छ। यसैबीच, मध्य र पश्चिमका किसानलाई हावाहुरी वा असिनापातको जोखिम कम भए पनि काटिएको धान खेतमै लामो समयसम्म नछाड्न सुझाव दिइएको छ।
