ललितपुर, पुस १० गते । जनता समाजवादी पार्टी (जसपा) नेपालमा आन्तरिक असन्तुष्टि चुलिँदै जाँदा पार्टीले ठूलो झट्का व्यहोर्नु परेको छ। केन्द्रीय सदस्य ज्ञानु लामा र दिलबहादुर तामाङको अगुवाइमा केन्द्रीय, प्रदेश, जिल्ला, नगरपालिका तथा विभिन्न भ्रातृ सङ्गठनमा आवद्ध सयौं नेता–कार्यकर्ताले सामूहिक रूपमा पार्टी परित्याग गरेका छन्।
संघीय समाजवादी फोरम स्थापनाकालदेखि निरन्तर पार्टीमा सक्रिय रहँदै आएका उनीहरूले जसपा नेपालको केन्द्रीय कार्यालय बालकुमारी, ललितपुरमा राजिनामा पत्र बुझाउँदै आजको मितिदेखि साधारण सदस्य समेत नरहने घोषणा गरेका हुन्।
राजिनामा पत्रमा उल्लेख भएअनुसार २०८२ साल भदौ २३ र २४ गते देखिएको ‘जेन जि आन्दोलन’ले नेपालको राजनीतिक धरातलमा गहिरो प्रश्न उठाएको भए पनि पार्टी नेतृत्वले त्यसको मर्मअनुसार सुधार र नेतृत्व हस्तान्तरण गर्न नसकेको आरोप लगाइएको छ। बागमती प्रदेश अधिवेशनमा देखिएका गतिविधि, समितिभित्र जातीय जनसङ्ख्याको असन्तुलन, फरक मतको अवमूल्यन, व्यक्ति केन्द्रित निर्णय हावी हुँदै जानु र सामूहिक निर्णय प्रक्रियाको कमजोर अभ्यासका कारण पार्टीमा बसिरहन उचित नदेखिएको उनीहरूको भनाइ छ।
सामूहिक राजिनामामा केन्द्रीय सदस्यहरू, प्रदेश सदस्यहरू, जिल्ला तथा नगरपालिका अध्यक्षसहित विभिन्न तहका ३१ जना मुख्य अगुवासँगै रसुवा, मकवानपुर, काभ्रे, भक्तपुर लगायत जिल्लाका सम्पूर्ण टिमहरू, मध्यपुर, सूर्यविनायक, नवबुद्ध र चाँगुनारायण नगरपालिकाका टिमहरू समेत सहभागी छन्।
यस घटनाले जसपा नेपालभित्र गहिरिँदो असन्तुष्टि र संगठनात्मक संकटलाई सतहमा ल्याएको छ भने पार्टीको आगामी राजनीतिक यात्रामा यसको प्रभाव महत्वपूर्ण हुने विश्लेषकहरूको भनाइ छ।
सामूहिक पार्टी परित्याग..!!
