काठमाडौँ, माघ ११ गते । आसन्न प्रतिनिधिसभा निर्वाचन २०८२ लाई लक्षित गर्दै नेपाल कम्युनिस्ट पार्टी (एमाले) र प्रगतिशील लोकतान्त्रिक पार्टीबीच चुनावी सहमति भएको छ। दुवै पार्टीका शीर्ष नेताहरूको उपस्थितिमा सम्पन्न सहमतिअनुसार विभिन्न निर्वाचन क्षेत्रहरूमा आपसी तालमेल गरी उम्मेदवारलाई समर्थन गर्ने निर्णय गरिएको हो।
सहमति अनुसार पश्चिम रुकुमबाट प्रगतिशील लोकतान्त्रिक पार्टीका उम्मेदवार श्री जनार्दन शर्मा र पूर्वी रुकुमबाट उम्मेदवार श्री सन्दीप पुनको पक्षमा एमालेले आँखा चिन्हमा मतदान गर्नेछ। त्यसैगरी कर्णाली प्रदेशका हुम्ला र जुम्ला बाहेकका जिल्लाहरू तथा पुरानो राप्ती अञ्चलका जिल्लाहरूमा नेकपा एमालेका उम्मेदवारहरूको पक्षमा सूर्य चिन्हमा प्रगतिशील लोकतान्त्रिक पार्टीले मतदान गर्ने सहमति भएको छ।
सहमतिको प्रभावकारी कार्यान्वयनका लागि दुवै पार्टीले आफ्ना आन्तरिक पंक्तिलाई अभिलम्ब आवश्यक निर्देशन दिने प्रतिबद्धता पनि व्यक्त गरेका छन्। नेताहरूले यो तालमेलले लोकतान्त्रिक शक्तिहरूलाई एकताबद्ध गर्दै निर्वाचनमा सकारात्मक सन्देश प्रवाह गर्ने विश्वास व्यक्त गरेका छन्।
उक्त सहमतिपत्रमा नेकपा एमालेका उपाध्यक्ष रामबहादुर थापा ‘बादल’ र प्रगतिशील लोकतान्त्रिक पार्टीका अध्यक्ष दुर्गा सोवले हस्ताक्षर गरेको छ।
