काठमाडौं, चैत्र ३ गते । हाल देशमा पश्चिमी न्यूनचापीय प्रणालीको प्रभाव कायम रहँदा मौसममा परिवर्तन देखिएको छ। जल तथा मौसम विज्ञान विभाग अन्तर्गतको मौसम पूर्वानुमान महाशाखाका अनुसार अहिले गण्डकी, लुम्बिनी, कर्णाली र सुदूरपश्चिम प्रदेशका साथै कोशी र बागमती प्रदेशका हिमाली तथा पहाडी क्षेत्रमा सामान्यदेखि मध्यम बदली छ भने अन्य स्थानमा आंशिक बदली रहेको छ।
हाल कोशी, गण्डकी, लुम्बिनी र कर्णाली प्रदेशका केही पहाडी तथा हिमाली क्षेत्रमा हल्का वर्षा र हिमपात भइरहेको जानकारी दिइएको छ।
महाशाखाले आज दिउँसो पनि देशका हिमाली क्षेत्रमा आंशिक बदली रहने जनाएको छ। विशेषगरी कोशी, बागमती र गण्डकी प्रदेशका हिमाली क्षेत्रका केही स्थानमा मेघगर्जन र चट्याङसहित हल्का वर्षा तथा हिमपातको सम्भावना रहेको छ। साथै, यी प्रदेशका पहाडी क्षेत्रमा पनि एक–दुई स्थानमा मेघगर्जनसहित हल्का वर्षा हुन सक्ने अनुमान गरिएको छ।
आज रातिको मौसम पूर्वानुमान अनुसार गण्डकी र कर्णाली प्रदेशका हिमाली क्षेत्रमा सामान्य बदली रहनेछ भने गण्डकी, लुम्बिनी, कर्णाली र सुदूरपश्चिम प्रदेशका पहाडी तथा तराई क्षेत्रमा आंशिक बदली रहनेछ। अन्य भू–भागमा भने मौसम सामान्यतया सफा रहने बताइएको छ।
त्यस्तै, कोशी, गण्डकी र कर्णाली प्रदेशका हिमाली क्षेत्रका एक–दुई स्थानमा राति पनि मेघगर्जन र चट्याङसहित हल्का वर्षा तथा हिमपातको सम्भावना रहेको महाशाखाले जनाएको छ।
