ललितपुर, चैत १७ गते । केही दिनअघि, एमालेका कार्यकर्ताहरूले आफ्ना पार्टी अध्यक्ष केपी शर्मा ओलीको पक्राउको विरोधमा नारा लगाउँदै हिँड्ने क्रममा एक ज्येष्ठ नागरिक माथि दुर्व्यवहार भएको भिडिओ सामाजिक सञ्जालमा भाइरल भएको थियो।
घटनापछि गृहमन्त्री सुधन गुरूङको निर्देशनमा ललितपुर प्रहरीले दुर्व्यवहार गर्ने व्यक्ति रामशरण शर्मा बजगाईंलाई नियन्त्रणमा लिई जिल्ला प्रहरी परिसर ललितपुरमा राखेर थप अनुसन्धान गरिरहेको छ।
यसैबीच, गृहमन्त्री सुधनले पीडित ज्येष्ठ नागरिकलाई ललितपुरस्थित उनका निवासमा पुगेर भेटेका छन्। आफू पीडित हुँदा तुरुन्तै कारवाहीमा उत्रिएर साथ दिएकोमा उनीहरूले गृहमन्त्री सुधनलाई धन्यवाद दिएका छन्।
घटनाबारे जानकारी पाएलगत्तै तुरुन्तै ‘एक्सन’ लिएको भन्दै गृहमन्त्री सुधनले यस्तो कार्यले नागरिकको सुरक्षामा सरकार कत्तिको संवेदनशील छ भन्ने देखाएको बताएका छन्।
