काठमाडौं,बैशाख ७ गते । गृहमन्त्री सुधन गुरुङले पछिल्लो समय आफ्नो नाम जोडेर भइरहेका आलोचना र आरोपप्रति कडा प्रतिक्रिया जनाएका छन्। सामाजिक सञ्जाल मार्फत सार्वजनिक गरेको नयाँ भनाइमा उनले राष्ट्रको ढुकुटीमा आँखा लगाउनेहरू नै अहिले त्रसित भएको दाबी गरेका छन्।
गृहमन्त्री गुरुङले “वर्षौंदेखि जसले राष्ट्रको ढुकुटीमा रगत पसिना साटेको पैसामा आँखा गाडेका छन्, उनीहरू आज डराएका छन्” भन्दै वर्तमान बहस र आलोचनालाई उनीहरूको ‘छटपटी’को रूपमा व्याख्या गरेका छन्। उनले मिडिया ट्रायल र प्रायोजित हल्लालाई वास्तविक मुद्दाबाट ध्यान भटकाउने प्रयासका रूपमा चित्रण गरेका छन्।
उनले भ्रष्टाचारविरुद्धको अभियान कुनै हालतमा नरोकिने र नडगमगाउने स्पष्ट पारे। “कारबाही रोकिँदैन, डगमगाइँदैन,” उनले उल्लेख गरेका छन्। साथै, उनले ठूलो परिमाणमा भ्रष्टाचार गर्नेहरूविरुद्ध अपेक्षित स्तरमा दबाब नदेखिएको भन्दै प्रश्न समेत उठाएका छन्। “दिनको ५० करोड भ्रष्टाचार गर्नेको पछाडि पनि यत्तिको दुःख गरेर लागेको देखिनँ,” उनले भनेका छन्।
उनको यो अभिव्यक्ति सार्वजनिक भएसँगै राजनीतिक वृत्तमा नयाँ बहस सुरु भएको छ। एकातिर समर्थकहरूले यसलाई भ्रष्टाचारविरुद्धको दृढ अडानको रूपमा व्याख्या गरेका छन् भने आलोचकहरूले भने अभिव्यक्तिलाई आरोप–प्रत्यारोपमै सीमित भएको टिप्पणी गरेका छन्।
यसअघि पनि गृहमन्त्री गुरुङले आफ्नो सम्पत्ति, सेयर लगानी र त्यससँग जोडिएका विवादबारे स्पष्टिकरण दिँदै आएका छन्। पछिल्लो अभिव्यक्तिले भने उनले आफ्नो कदमप्रति झनै दृढ रहेको सन्देश दिन खोजेको देखिन्छ।
