काठमाडौं,बैशाख ८ गते । आज बसेको मन्त्रिपरिषद् बैठकले विभिन्न नीतिगत तथा प्रशासनिक निर्णयहरू गरेको छ। बैठकले नेपाल धितोपत्र बोर्डको अध्यक्ष नियुक्तिका लागि सिफारिस समिति गठन गर्ने निर्णय गरेको छ। राष्ट्रिय योजना आयोगका उपाध्यक्ष डा. गुणाकर भट्टको संयोजकत्वमा गठित समितिमा अर्थ सचिव घनश्याम उपाध्याय र काठमाडौंका भूवन कुमार दाहाल सदस्य रहनेछन्।
त्यसैगरी, सरकारले नेपाल विशेष सेवा ऐन, २०४२ लाई संशोधन गर्न बनेको विधेयक संघीय संसद्मा पेश गर्न स्वीकृति दिएको छ। प्रतिनिधिसभा सदस्य निर्वाचन ऐन, २०७४ तथा मतदाता नामावली ऐन, २०७३ लाई संशोधन गर्न बनेका विधेयकहरू पनि संसद्मा पेश गर्न स्वीकृत गरिएको छ।
बैठकले समस्याग्रस्त सहकारी व्यवस्थापन समितिमा नयाँ नियुक्ति समेत गरेको छ। समितिको अध्यक्षमा प्युठानका डिल्लिराज आचार्य नियुक्त भएका छन् भने सदस्यहरूमा धादिङका नवराज सिम्खडा र ललितपुरका रोशनबहादुर शाक्यलाई मनोनयन गरिएको छ।
सरकारका यी निर्णयहरूलाई प्रशासनिक सुधार, कानुनी संरचना सुदृढीकरण तथा सहकारी क्षेत्र व्यवस्थापनका दृष्टिले महत्वपूर्ण मानिएको छ।
