हेटौँडा,जेठ ७ गते। सरकारले सरकारी मातहतका सबै विज्ञापनहरू सरकारी सञ्चार माध्यममार्फत मात्रै प्रवाह गर्ने नीतिगत निर्णय गरेपछि निजी क्षेत्रबाट सञ्चालित सञ्चार माध्यमहरू आन्दोलित बनेका छन् । उक्त निर्णयलाई विभेदकारी र प्रेस स्वतन्त्रता विरोधी भन्दै नेपाल पत्रकार महासंघले देशव्यापी दबाबमूलक आन्दोलनका कार्यक्रम अघि बढाएको छ ।
महासंघले दोस्रो चरणको आन्दोलनअन्तर्गत केन्द्रदेखि देशभरका शाखामार्फत सप्ताहव्यापी हस्ताक्षर संकलन अभियान सञ्चालन गरिरहेको छ । सोही अभियानअन्तर्गत आज मकवानपुर जिल्लामा पनि पत्रकार, सञ्चारगृह सञ्चालक तथा सञ्चारकर्मीहरूको सहभागितामा हस्ताक्षर अभियान सम्पन्न गरिएको छ ।
मकवानपुरमा विभिन्न सञ्चार माध्यममा कार्यरत पत्रकारहरू तथा मिडिया सञ्चालकहरूले एकमत हुँदै सरकारी निर्णयप्रति असहमति जनाएका छन् । उनीहरूले प्रेस तथा अभिव्यक्ति स्वतन्त्रतामाथि हस्तक्षेप हुने गरी ल्याइएको नीति तत्काल सच्याउन माग गरेका छन् ।
अभियानमा सहभागी सञ्चारकर्मीहरूले सरकारी विज्ञापन वितरणमा विभेदकारी नीति लागू गरिए निजी सञ्चार क्षेत्र थप संकटमा पर्ने बताएका छन् । उनीहरूले लोकतान्त्रिक व्यवस्थामा स्वतन्त्र सञ्चार क्षेत्रलाई कमजोर बनाउने कुनै पनि निर्णय स्वीकार्य नहुने धारणा व्यक्त गरेका छन् ।
नेपाल पत्रकार महासंघले सञ्चालन गरेको यो अभियान देशव्यापी रूपमा विस्तार भइरहेको छ । हस्ताक्षर अभियानमार्फत राज्यको सम्बन्धित निकायलाई खबरदारी गर्दै निर्णय पुनर्विचार गर्न दबाब सिर्जना गर्ने उद्देश्य रहेको महासंघले जनाएको छ ।
सरकारको उक्त निर्णयप्रति सञ्चार क्षेत्रबाट व्यापक असन्तुष्टि देखिएको अवस्थामा यो आन्दोलनले सम्बन्धित निकायमा कस्तो प्रभाव पार्छ भन्ने विषयलाई चासोका साथ हेरिएको छ ।
