हेटौंडा, असार १८ गते । एमसिए साझेदारी कार्यक्रम अन्तर्गत विद्युत उपयोग अभिवृद्धि गर्ने उद्देश्यले हेटौंडा उपमहानगरपालिकामा सीपमूलक क्षमता विकास तालिम सुरु गरिएको छ। कार्यक्रमको उद्घाटन हेटौंडा उपमहानगरपालिकाकी नगर प्रमुख मिना कुमारी लामाले गरेकी हुन्।
प्रशारण लाइनबाट प्रभावित वडा नम्बर १, ३, १०, ११ र १९ का स्थानीय सहभागीहरूलाई लक्षित गर्दै जनरल कुक, मोबाइल मर्मत, बारिष्टा तथा ब्युटी पार्लर सम्बन्धी ६५ दिने तालिम सञ्चालन गरिएको जनाइएको छ।
तालिम उद्घाटन कार्यक्रममा वडा नम्बर ४ का अध्यक्ष नविन सिग्देल, वडा नम्बर १० का अध्यक्ष फुर्वा दोर्जे लामा तथा वडा नम्बर ११ की अध्यक्ष जुना दाहाल लगायत जनप्रतिनिधिहरूको उपस्थिति रहेको थियो।
कार्यक्रमका क्रममा वक्ताहरूले सीप विकासमार्फत सहभागीहरूलाई स्वरोजगार र आयआर्जनका अवसरसँग जोड्ने उद्देश्य रहेको बताएका थिए। तालिम अवधिभर अनुभवी प्रशिक्षकमार्फत व्यावहारिक तथा सैद्धान्तिक दुवै प्रकारको प्रशिक्षण प्रदान गरिने जानकारी दिइएको छ।
स्थानीय स्तरमा दक्ष जनशक्ति उत्पादन गर्दै आर्थिक सशक्तीकरणमा टेवा पुर्याउने लक्ष्यसहित तालिम सञ्चालन गरिएको आयोजकले जनाएको छ।
