हेटौंडा। मकवानपुरको गाउँपालिका ३ स्थित उत्तरी क्षेत्रमा पर्ने सिस्नेरी खोलामा आज ३ बालक डुबेर मृत्यु भएको छ।
काभ्रे जिल्ला घर भई हाल सिस्नेरी मामाघर आएका दुई बालक र सिस्नेरी डोडारेका एकजना बालकको सिस्नरी बजार पछाडि अवस्थित खोलामा पौडी खेल्ने क्रममा आज दिउँसो मृत्यु भएको हो। तिनै जना बालक आज अपरान्ह करिब साढे ४ बजेतिर खोलामा डुबेर मृत्यु भएको इलाका प्रहरी कार्यालय भीमफेदीले जानकारी दिए।
मृत्यु हुनेहरूमा इन्द्रसरोवर गाउँपालिका ३ सिस्नेरी डोडारेका श्यामबहादुर आचार्यका छोरा वर्ष १४ का सुशान्त आचार्य, काभ्रेको फुलबारी दाप्चा घर भएका वर्ष १४ का प्रमेश घोरासैनी र वर्ष ११ का प्रमाध घोरासैनी रहेका छन्।
ती तीनैजना खोलामा नुहाउने क्रममा पानीमा डुबेर मृत्यु भएको इलाका प्रहरी कार्यालय जानकारी दिएको छ।
उनीहरू तीनैजना सिस्नेरी खोलाको ढुङ्गाको ओडारमा जमेको पानीमा नुहाउन भनेर घरबाट गएको प्रहरीले जानकारी दिएको छ।
