मोरङ। दलित समुदायको हकहित सुनिश्चित गर्ने उद्देश्यले आयोजित दुईदिने कानूनी साक्षरता तालिम सोमबार सम्पन्न भएको छ। दिब्यज्योति मिडिया प्रालिको आयोजनामा तथा उर्लाबारी नगरपालिका वडा नं. ३ को आर्थिक सहयोगमा सञ्चालित तालिम उर्लाबारी–३ स्थित दुर्गा मन्दिरको सभा हलमा सम्पन्न भएको हो।
कार्यक्रम दिब्यज्योति मिडिया प्रालिका अध्यक्ष कुमार खड्काको अध्यक्षतामा सम्पन्न भएको थियो भने प्रमुख अतिथिको रूपमा जिल्ला समन्वय समिति मोरङका सदस्य मित्र प्रसाद ढकालको उपस्थिति रहेको थियो।
समापन कार्यक्रममा वडा नं. ६ की वडा सदस्य कृष्ण कुमारी विक, अधिकारकर्मी सम्झना मोते, बिमला सुन्दास, सञ्चारकर्मी दिलिप पोखरेल लगायतको उपस्थिति रहेको थियो। कार्यक्रममा शुभकामना मन्तव्य राख्दै वडा सदस्य कृष्ण कुमारी विकले दलित समुदायको सशक्तिकरणमा यस्ता तालिमहरूले महत्वपूर्ण योगदान पुर्याउने विश्वास व्यक्त गरिन्। त्यस्तै, अधिकारकर्मी सम्झना मोतेले दलित समुदायप्रति गैर–दलितको दृष्टिकोणमा क्रमशः सकारात्मक परिवर्तन देखा पर्न थालेको धारणा राखिन्।
प्रमुख अतिथि ढकालले तालिममा सहभागीहरुलाई प्रमाणपत्र वितरण गर्दै पछाडि पारिएका वर्गका लागि यस्ता कानूनी साक्षरता कार्यक्रमहरूले सशक्तिकरणमा सहयोग पुग्ने बताए। दुई दिनसम्म सञ्चालन भएको तालिम सञ्चारकर्मी घनश्याम भण्डारीले सञ्चालन गरेका थिए भने प्रशिक्षक उमेश विश्वकर्माले प्रशिक्षण दिएका थिए।
तालिममा वडा नं. ३ मा बसोबास गर्ने दलित समुदायका सदस्यहरूको उल्लेखनीय उपस्थिति रहेको थियो । तालिमले दलित समुदायमा कानूनी चेतना अभिवृद्धि गर्दै आफ्ना अधिकारप्रति सजग बनाउन मद्दत गरेको तालिमका सहभागीले बताका छन ।
