दाङ। लुम्बिनी प्रदेशसभा सदस्य गीता गुरुङले आज आफ्नो पदबाट राजीनामा दिएकी छन्। सीके राउत नेतृत्वको जनमत पार्टीकी समानुपातिक सांसद गीता गुरुङले जनताले तिरेको करबाट प्राप्त हुने पारिश्रमिक लिन आफूलाई उपयुक्त नलागेको भन्दै सभामुखलाई सम्बोधन गरी राजीनामा पत्र बुझाएकी हुन्।
उनले राजीनामा पत्रमा राष्ट्र, देश र जनताभन्दा माथि कोही नहुने उल्लेख गर्दै जनताले तिरेको करबाट पाउने पारिश्रमिक लिन उपयुक्त नलागेकोले पदबाट राजीनामा दिएको उल्लेख गरेकी छन्।
उनले पत्रमा लेखेकी छन्, “मेरा आदरणीय जनताको सेवा गर्न र मप्रति कार्यक्षमताको आश गरिबसेका मेरा स्वाभिमानी जनता आमाबुबा,दाजुभाइ दिदीबहिनीलगायतका आशाका किरणहरू स्वलुप्त भइरहेको मलाई आभास भइरहेको छ।” उनले देश र जनताको पीर मर्का आफूले राम्ररी बुझेको तर राष्ट्र र जनताभन्दा माथि केही हुँदैन भन्ने मान्यता रहेको पनि उल्लेख गरेकी छन्।
