बाग्लुङ। बागलुङ जिल्लाका पाँच स्थानीय तहलाई पूर्णखोप सुनिश्चितता तथा दिगोपन भएका पालिका घोषणा गरिएको छ। यसमा बागलुङ, गलकोट, ढोरपाटन र जैमिनी नगरपालिकाका साथै ताराखोला गाउँपालिका रहेका छन्।
यी पालिकाहरूले जन्मेदेखि १५ महिना र १६ देखि २४ महिना उमेर समूहका बालबालिकाहरूलाई नियमित खोप लगाएर यो सुनिश्चितता हासिल गरेका हुन्। बागलुङ नगरपालिकामा १,११२ बालबालिका, गलकोटमा ७५४, ढोरपाटनमा १,०६२, जैमिनीमा ५३९ र ताराखोलामा १९३ बालबालिकाले पूर्ण खोप पाएका छन्।
जिल्लाका सबै स्वास्थ्य संस्थामार्फत खोप सेवा उपलब्ध गराइएको छ। निसिखोला, तमानखोला, काठेखोला, बडिगाड र बरेङ गाउँपालिका भने पूर्णखोप घोषणा हुन बाँकी छन्।
यी पाँच पालिकाले पनि पूर्ण खोपको सुनिश्चितता गरेपछि यही जेठ २५ गतेसम्ममा बागलुङ जिल्लालाई पूर्णखोप सुनिश्चितता तथा दिगोपन भएको जिल्ला घोषणा गरिने प्रदेश जनस्वास्थ्य कार्यालय बागलुङले जनाएको छ।
