काठमाडौं। अभिनेत्री सुहाना थापाले अमेरिकाको न्यूयोर्कस्थित कोलम्बिया विश्वविद्यालयबाट परामर्श तथा चिकित्सा मनोविज्ञान विषयमा स्नातकोत्तर (मास्टर्स) उत्तीर्ण गरेकी छिन्। उनी हालै सोही विश्वविद्यालयमा दीक्षित भएकी हुन्।
छोरी मनोविज्ञ बनेकोमा सुहानाका बुवा तथा फिल्म निर्माता सुनिलकुमार थापाले खुसी व्यक्त गरेका छन्। उनले यस क्षणलाई आफ्नो जीवनको अविस्मरणीय बताएका छन्। थापाले शिक्षा र संस्कारलाई सन्तानका लागि अमूल्य सम्पत्ति भएको भन्दै छोरीको समर्पण र मेहनतको प्रशंसा गरेका छन्।
सुहानाको दीक्षान्त समारोहमा सहभागी हुन उनकी आमा तथा फिल्म निर्देशक झरना थापा पनि न्यूयोर्कमा छिन्। आमा-छोरी शुक्रबार नेपाल फर्कँदैछन्।
नेपाल फर्केपछि उनीहरू होमप्रोडक्सन फिल्म ‘ए मेरो हजुर ५’ को तयारीमा जुट्नेछन्। भदौदेखि छायांकन सुरु हुने यस फिल्ममा सुहाना मुख्य अभिनेत्रीको भूमिकामा देखिनेछिन्। निर्माता थापाका अनुसार यो फिल्ममा नयाँ अभिनेतालाई मुख्य भूमिकामा डेब्यु गराउने तयारी छ।
