हेटौंडा । सार्वजनिक जमिनमा हुकुमबासिलाई भन्दा सुकुम्बासीलाई राख्नका लागि नेकपा मकवानपुरले तयारी गरिरहेको छ । यसका लागि नेकपाले दिपक प्रसादको संयोजकत्वमा हेटौंडा-१ चौकिटोल स्थित राप्ती किनारामा रहेको सार्वजनिक जमिन संरक्षणका लागि ५१ सदस्यीय संघर्ष समिति गठन गरेको छ । बिहीवार बसेको भेलाले उक्त कार्य समिति चयन गरेको हो ।
विगतमा सरकारी तथा संस्थागत प्रयोजनका लागि छुट्याएर राखेको सार्वजनिक जमिन केही स्थानिय व्यक्तिहरुले वडाको सहायतामा भागबन्डा गरि बेची खान थालेकोले नेपाल कम्युनिस्ट पार्टिको सहभागितामा उक्त कार्य रोकथामका लागि सम्बन्धित सबै निकायमा ध्यानाकर्षण पत्र बुझाइएको थियो । नेकपाले हाल उक्त जमिनमा हुकुम्बासीलाई बस्न दिनुभन्दा सुकुम्बासीलाई बस्न दिनुपर्छ भनी सार्वजनिक जमिन संरक्षणका लागि संघर्ष समिती निर्माण गरिएको हो । साथै ४/५ सय घरधुरी सुकुम्बासीको फारम भरी आइतबार ११ गते भुमी आयोगमा बुझाउने तयारी पनि गरिरहेको नेकपा मकवानपुरका जिल्ला सेक्रेटरी पेमा सीले जानकारी दिएका छन् ।
मकवानपुर लगायत अन्य जिल्लाका घरबार बिहिन तथा कोठाभाडामा बसिरहेका नागरिकलाई एक टुक्रा भए पनि जमिन उपलब्ध गराएर बस्न वातावरण बनाउन नेकपाले भरपुर तयारी गरिरहेको छ ।
